Иқлими Тоҷикистон барои намудҳои варзиши обӣ мусоид буда, имрӯз таваҷҷуҳи Ҳукумати кишвар барои рушди ин риштаи варзиш назаррас аст. Қаиқронӣ низ як самти афзалиятноки намуди варзиши обӣ ба шумор меравад. Ин риштаи варзиш аввалин бор дар Тоҷикистон соли 1956 аз ҷониби мураббиёни Беларуссия оилаи Денисиявҳо бо фармони кумитаи варзиши СССР ба Тоҷикистон ворид карда шуд. Аз ҳамон давраҳо ин намуди варзиш дар Тоҷикистон рушду равнақ ёфта, дар байни давлатҳои шӯравӣ ва ҷаҳон варзишгарони маъруфи ҳамонвақта Салом Ҳакимов, Иброҳим Ҳасанов тавонистанд, ному шарафи кишварро баланд бардоранд.

Пас аз пош хӯрдани Иттиҳоди Шуравӣ дар оғози соҳибистиқлолии мамлакат ин намуди варзиш каме аз рушд бозмонд. Баъдан бо дастгирии Ҳукумати мамлакат бевосита Президенти кишвар ва Кумитаи кор бо ҷавонон ва варзиши назди Ҳукумати Ҷумҳурии Тоҷикистон фаъолияташ беҳтар шуда, намояндагони ин риштаи варзиш дар мусобиқаҳои осиёву ҷаҳон парчами Тоҷикистонро баланд бардоштанд.

Оид ба рушди ин намуди варзиш дар даврони соҳибистиқлолӣ директори Муассисаи варзишҳои обӣ дар Тоҷикистон Ҳасан Шарипов чунин иброз намуд: "Солҳои охир ин намуди варзиш дар кишвари мо рушду равнақ ёфта, дар ин муддат мо тавонистем, бо дастгирии Ҳукумати мамлакат, бевосита Президенти кишвар Пешвои миллат муҳтарам Эмомалӣ Раҳмон ва Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Кумитаи миллии олимпии Тоҷикистон ва худи федератсияи Қаиқронии Ҷумҳурии Тоҷикистон шартномаҳои нақшавию амалии дурнамо таҳия карда, дар мусобиқаҳои осиёиву ҷаҳонӣ ҷойҳои намоёнро ишғол намоем ва ҳатто ғолиби Ҷоми ҷаҳон гардем. Бо маблағгузории Бонки миллии Тоҷикистон мо тавонистем, 30 адад қаиқҳои замонавӣ ва апартаҳои қаиқронӣ харидорӣ намоем. Ҳамчунин бо супориши Президенти кишвар қаиқронӣ дар дарёҳо низ ба роҳ монда шуд ва бо ин васила аз Олмон киштиҳои калони Слад харидорӣ гардид. Шароит барои рушди ин варзиш хуб ба роҳ монда шуда, машқҳои тамринӣ дар ду баст дар Кӯли ҷавонон баргузор мешавад. Машқҳои асосие, ки барои мусобиқаҳои ҷаҳонӣ ҷараён мегиранд, чанд моҳ қабл аз мусобиқа дар обанборҳои Норак, Сангтӯда ва Искандаркӯл ба роҳ монда мешавад. Ҳадафи мо ин роҳ ёфтан ба Бозиҳои олимпӣ мебошад. Мо мехоҳем ҷавонону наврасонро бештар даъват намоем, то аз байни онҳо нафароне пайдо гарданд, ки тавонанд Парчами кишварро баланд бардоранд".

Оид ба нақшаҳо ҳолати кунунӣ ва ҷалби варзишгарон мураббии шоистаи Ҷумҳурии Тоҷикистон оид ба қаиқронӣ Набиев Зоҳирҷон гуфт:

"Аз моҳи декабри соли 2019 мо омодагии худро барои дарёфти роҳхат ба Бозиҳои олимпии Токио-2020 медидем, ки чор марҳилаи машқии мо дар шаҳри Норак баргузор гардид. Ҳамчунин моҳи март дар Таиланд бояд Чемпионати Осиё баргузор мегардид. Аммо бинобар сабаби пандемия ин мусобиқаҳо ба муҳлати дигар гузошта шуд. Айни ҳол мо дар шаҳри Норак барои чемпионати мазкур, ки моҳи марти соли 2021 бояд дар Таиланд баргузор шавад ва чемпионати ҷаҳон, ки дар шаҳри Барнаули Руссия доир мегардад, омодагӣ дида истодаем. Ба нақша гирифтаем, ки шаш нафар варзишгарро омода намоем ва мақсади асосии мо ин роҳхат гирифтан, ба Бозиҳои олимпист.

Мо шавқмандони ин навъи варзишро бештар бо роҳи таблиғот ҷамъ меоварем. Наврасону ҷавонон аз лагерҳои тобистона ҷалб гардида, ба онҳо дарсҳои тамринии ройгон ба роҳ монда шудааст. Шумораи варзишгарон аз ҷониби наврасону ҷавонон ба ин намуди варзиш дар Тоҷикистон аз 500 то 1000 нафар мерасад ва ин боиси ифтихор аст".

Маҳз бо заҳматҳои зиёди мураббиёни номии ин соҳа чанд нафар варзишгарони мо тавонистанд, парчами кишварро дар арсаи байналмилалӣ баланд бардоранд. Аз ҷумла, Шаҳриёр Даминов соли 2018 ғолиби Чемпионати Осиё ва соли 2019 ғолиби Ҷоми ҷаҳон дар Ҳиндустон гардид. Инчунин Нурмуҳаммад Тоҳиров дар Ҷоми ҷаҳон соли 2019 ҷои сеюмро ишғол намуд.
Оид ба сирри муваффақиятҳои худ Шаҳриёр Даминов гуфт:

"Инсон вақте ба коре шурӯъ мекунад, пеш аз ҳама дар назди худ ҳадафу мақсади муайян мегузорад ва маҳз ин ҳадафу мақсад инсонро сӯи қуллаҳои муваффақият мебарад. Ман бо хоҳиши волидонам ба ин варзиш рӯ овардам. Вақте вориди ин намуди варзиш гардидам, хеле мушкилиҳои зиёдро паси сар кардам. Зеро қаиқронӣ мушкил буда, аз варзишгар сабру таҳаммулро талаб менамояд. Имрӯзҳо сабаби рӯ наовардани бештари ҷавонон ба ин намуди варзиш дар мушкилу заҳматталаб буданаш аст. Аммо ҳама чӣ аз худи шахс вобаста аст. Агар босабр бошед, муваффақ мегардед".

Исфандиёр АМАКҶОНОВ,
коромӯзи “ҶТ”