ВАРЗИШ
Душанбе 24 Июн 2024 04:16
10384
Шоми 28-уми май муштзани шинохтаи кишвар Асрор Воҳидов пирӯзии дуюми хешро дар муҳорибаҳои мусобиқаи 2-юми интихобии олимпӣ дар шаҳри Бангкок ба даст овард.

Бегоҳии дирӯз муштзанҳои тоҷик Фотима Бегмуродова ва Асрор Воҳидов рақобатҳояшонро доир карданд. Асрор бо пирӯзӣ ва Фотима бо бохт рақобатро ҷамъбаст карданд.

Асрор Воҳидов (57 кг) рақобати дуюмашро бидуни мушкили муқобили намояндаи Косово - Башким Боҷоку бо қарори якдилонаи доварон бо ҳисоби 5:0 бо ғалаба ба анҷом расонид. Дар марҳилаи ҳаштякниҳоӣ Асрор Воҳидов рӯзи 30-юми рақобатро идома медиҳад.

Фотима Бегмуродова (54 кг) дар даври аввали мусобиқаи интихобии Бозиҳои Олимпӣ дар Тайланд аз муштзани маҷорӣ Ҳанна Лакотар мағлуб шуд. Муштзанбонуи мо дар раунди аввал фаъол буд, лек дар раундҳои минбаъда рақиб бештар афзалият дошт.

Имрӯз дар мусобиқаи мазкур 2 муштзани дигари мо ҳунарнамоӣ мекунанд. Муҳаммад Аброриддинов (+92 кг) дар даври аввал бо намояндаи Кореяи Ҷанубӣ - Ким Доҳйеон нерӯсанҷӣ мекунад.

Дар мусобиқа 578 муштзан аз 132 давлат дар 13 вазн (7 вазни мардҳо, 6 вазни бонувон) барои 51 роҳхати боқимонда (28 роҳхат барои мардҳо, 23 роҳхат барои бонувон) талош доранд.

Ёдовар мешавем, ки қаблан аз муштзанҳои тоҷик Шоира Зулқайнарова (60 кг) , Шамшер Саидов (71 кг) ва Некрӯз Салимов (80 кг) мағлуб шуда, аз ҳаққи ба даст овардани роҳхати олимпӣ бенасиб монда буданд.

Яҳё МАҲМАДНАБИЕВ, “ҶТ”

Эзоҳи худро нависед



Рамзҳо дар расм