Тавре маълум аст, чемпионати Осиё - 2020 оид ба футзал рӯзҳои 23-юми март - 3-юми апрели соли 2021 дар давлати Қувайт баргузор мегардад. Дастаи мунтахаби миллии футзали Тоҷикистон низ дар ин чемпионат иштирок мекунад. Дар мавриди омодагии варзишгарони тоҷик ба ин чемпионат ва бо кадом дастаҳо бозӣ намудани дастаи Тоҷикистон суҳбате доштем бо Александр Дзабирадзе, мураббии асосии тими миллии футзали Тоҷикистон.



- Лутфан дар бораи гузаронидани тамрин бо варзишгарон каме маълумот медодед.

- Сар карда аз моҳи октябр бо варзишгарон тамрин карда истодаем. Пас аз финали чемпионати Тоҷикистон оид ба футзал бошад, бо варзишгарон ба чемпионати Осиё - 2020 тайёрии ҷиддӣ мебинем. Яъне тамринҳо ба таври мукаммал идома доранд.

- Оё варзишгарон пас аз муддати тӯлонии карантинӣ аз сабаби эпидемия барои чемпионат тайёр ҳастанд?

- Бале, варзишгарон ҳатто пас аз ин муддати тӯлонии карантин омодаанд, ки дар мусобиқа ширкат варзанд. Зеро варзишгарони мо ба беморӣ нигоҳ накарда, дар ин муддат низ аз тамрин даст накашида, машқ карданд. Варзишгарони дастаи мо ин муддат дар ҷойҳои зисташон машқ мекарданд, ки ҳамеша омодаи иштирок дар мусобиқаҳои дохили кишвар ва берун аз он бошанд.

- Ба тими миллии футзали Тоҷикистон асосан киҳо дохил мешаванд?

- Асосан ба тими миллии футзали Тоҷикистон 3 даста дохил мешавад: дастаҳои “Сипар”, “Соро” ва “Муҳоҷир”. То ҳадди имкон кӯшиш мекунем, ки ҳамаи варзишгаронро даъват кунем. Ҳозир мо 17 бозингар дорем ва агар имконият бошад, ҷавонони дигарро низ даъват мекунем. Охирҳои моҳи ноябр тими асосӣ тайёр шуда, ба чемпионати Осиё - 2020 омодагии ҷиддӣ мебинем.

- Рақиби дастаамон тими кадом давлатҳо мешаванд?

- Дастаи мунтахаби миллии футзали Тоҷикистон асосан бо 3 тим бозӣ мекунад ва рақибонамон мунтахабҳои Ветнам, Туркманистон ва Яман мебошанд.

- Ба рақибонатон чӣ гуна баҳогузорӣ мекунед?

- Рақибонамон дастаҳои хубанд. Масалан бозии авваламон бо дастаи мунтахаби Ветнам баргузор мегардад, ки дастаи хело ҳам боқувват аст. Аз ин сабаб мо пешакӣ ҷамъ мешавем ва мебинем, ки онҳо чи тавр бозӣ мекунанд, тактикаи бозиашон чӣ гуна аст, баъдан хулосабарорӣ мекунем, ки чи тавр дар мусобиқа бо онҳо бояд бозӣ кунем.

Туркманистон низ дастаи бақувват мебошад ва мураббиашон аз Хорватия аст. Ва чи тавре ки дар боло қайд кардам, аз тарзи бозӣ карданашон дар рафти кор пешакӣ хабардор мешавем.
Дастаи охирин бошад, дастаи мунтахаби Яман мебошад, ки ин даста аз дигар дастаҳо сусттар аст.
  
Аз таҷрибаҳои гузаштаашон дур нарафта, мусобиқаҳои охиринро гирем, Туркманистон дар Аврупо дар мусобиқаҳои гуногун иштирок карда, ғолиб набаромадааст. Ҳатто бо дастаҳои миёнаи Аврупо бозӣ карда, шикаст хӯрданд.

Аз таҷрибаҳои гузаштаи Ветнам бошад, маълум мешавад, ки дастаи хело хуб ва муваффақиятҳои зиёд доранд. Онҳо ҳатто як маротиба дар чемпионати ҷаҳон иштирок карданд. Аз ин бармеояд, ки рақибони мо дастаҳои олидараҷа мебошанд.

- Панҷ дастаи беҳтарини чемпионати Осиё-2020 ба чемпионати ҷаҳон оид ба футзал, ки соли оянда дар Литва доир мешавад, роҳхат мегиранд. Мухлисони футзали тоҷикро шумо то куҷо ва бо кадом далел метавонед умедвор кунед, ки ҳаддалимкон ба ҳамин 5 дастаи беҳтарин дохил мешавед?

- Дар чемпионати Осиё 16 даста иштирок мекунанд, ки дастаҳои хело бақувватанд ва дар чемпионати ҷаҳон бошад танҳо 5 дастаи беҳтарин, ки пас аз чемпионати Осиё роҳхат меёбанд. Аммо дастаи мунтахаби мо низ хело боқувват аст ва ман боварӣ дорам, ки онҳо дар байни ин 5 дастаи беҳтарин интихоб мешаванд. Онҳо имконияти ба даст овардани ин ғолибиятро доранд ва мақсади асосии иштирокамон дар ҳар мусобиқа низ ғалаба аст.

Бодом БАХТИЁРОВА,
коромӯзи “ҶТ”