Нимҳимоятгари 21-солаи тими миллии Тоҷикистон Алишер Шукуров фаъолияти худро дар ҳайати қаҳрамони ҳаждаҳкаратаи Гурҷистон, бошгоҳи футболи “Динамо”-и Тифлис идома медиҳад.

Дар ин бора телеграмканали Федератсияи футболи Тоҷикистон хабар медиҳад.

Алишер Шукуров бо серҷоизатарин бошгоҳи Гурҷистон шартномаи дусола баст. Шукуров дар ҳайати мунтахаби Тоҷикистон шаш бозӣ анҷом додааст. Ӯ нахустин бозиашро дар ҳайати тими миллии Тоҷикистон 17 октябри соли гузашта дар даври ниҳоии мусобиқаи байналмилалии “Merdeka Cup-2023” дар Куала-Лумпур гузаронида буд, ки тими мо бар Малайзия бо ҳисоби 2:0 пирӯз шуда буд.

Дар охирин Ҷоми Осиё-2023 дар Доҳа Алишер Шукуров дар ҳамаи панҷ бозии тими мо ширкат карда, дар маҷмӯъ 459 дақиқаро дар майдон сипарӣ кардааст. Ва маҳз бозии арзандааш дар Ҷоми Осиё талабгоронашро дар бозори трансфермаркет афзуд.

Яҳё МАҲМАДНАБИЕВ “ҶТ”