Бахши кор бо ҷавонон ва варзиши ноҳияи Рӯшон силсилачорабиниҳои наврӯзӣ ва мусобиқаҳои кушодро байни ҷавонону наврасон ҷамъбаст намуд.

Ҳамин гуна, дар мусобиқаи арғамчинкашӣ аз миёни ноҳияҳои Ванҷ, Рӯшон, Шуғнон ва шаҳри Хоруғ, Ванҷ ғолиби мусобиқа гашта, ҷойи якумро ишғол кард. Зинаи дуюм насиби дастаи ҷавонони Хоруғ шуд.

Аз рӯи намуди вазнбардорӣ ноҳияи Рӯшон сазовори ҷои аввал ва Хоруғу Ванҷ бошанд, зинаҳои дуюму сеюмро ба даст оварданд.

Дар мусобиқаи шоҳмотбозӣ аз аввал 24 бозингар бо ҳам рақобат карданд, аммо даври охир ба фоидаи шоҳмотбозони Рӯшон – Азиз Ғазалов (ҷойи I), Худоназар Шоназаров (ҷойи II) ва Султоназар Суфишоев (ҷойи II) анҷом ёфт.

Бозии волейбол байни 12 дастаи ҷавонони ҷамоатҳои Рӯшон сурат гирифт. Лекин даври ниҳоӣ ба манфиати тими “Вамар 1” хотима ёфта, ин даста соҳиби ҷойи аввал ва ғолиби мусобиқа гашт. Дастаи “Бартанг” сазовори зинаи дуюм шуд.

Мусобиқаи кушод аз намуди тенниси рӯи миз бо ширкати 58 варзишгар рӯи кор омад. Мувофиқи натиҷаҳои даври охир бозингарони Рӯшон - Раҳматшо Мамадакимов, Аловатшо Аловатшоев ва Меҳроҷ Назаралиев ҷойҳои I, II, III ро соҳиб гардиданд.

Ҳамзамон, гӯштини миллӣ дар варзишгоҳи Барушон дар сатҳи баланд гузаронида шуда, дар он паҳлавонон аз ноҳияҳои Ванҷ, Роштқалъа, Шуғнон ва шаҳри Хоруғ бо ҳам қувваозмоӣ карданд.

Ғолибони ҳамаи чорабиниҳои варзишӣ аз тарафи бахшу Мақомоти маҳаллии ҳокимияти давлатии ноҳия бо медал, ифтихорномаю мукофотпулӣ ва дигар туҳфаҳои арзанда сарфароз гардонида шуданд.