Дар Кумитаи ҷавонон, варзиш ва сайёҳии назди Ҳукумати ҷумҳурӣ мулоқоти роҳбарияти кумита бо роҳбарияти Маркази минтақавии зиддидопингӣ доир гардид.

Дилшод Назаров, муовини раиси Кумитаи ҷавонон, варзиш ва сайёҳӣ барои ҳамкориҳои судмад бо Кумитаи ҷаҳонии зиддидопингӣ изҳори сипос намуд.

Дилшод Назаров аз қавли Пешвои миллат, Президенти ҷумҳурӣ, муҳтарам Эмомалӣ Раҳмон иброз намуд, ки варзишгарон муаррификунандаи давлат ва миллат ба ҳисоб мераванд ва таваҷҷуҳи зиёди Ҳукумати кишвар барои рушди ин соҳа равона гардидааст.

Майра Бакашева, директори Маркази минтақавии зиддидопингӣ низ дар навбати хеш ба Ҳукумати Ҷумҳурии Тоҷикистон ва сохторҳои масъуле, ки бевосита дар соҳаи варзиш кору фаъолият менамоянд, барои дастовардҳои назаррасашон дар соли 2016 изҳори сипос намуд.

Ҷонибҳо дар рафти мулоқот масъалаҳои доир ба таъсиси Маркази миллии зиддидопнигӣ дар Тоҷикистон, зиёд намудани сафи мутахассисон ва ғайраро баррасӣ намуданд.

Тарафҳо омодагии худро оид ба роҳандозӣ намудани масъалаҳои баррасигардида ва ҳамкориҳои минбаъда иброз намуданд.

Тоҷикистон соли 2012 ба Конвенсияи байналмилалии зиддидопингӣ имзо гузошт, ки дар доираи он муваззаф аст, талаботи онро риоя намуда, мутобиқи он фаъолияташро ба роҳ монад.