Дар шаҳраки Шайдони ноҳияи Ашт мусобиқаи ҷумҳуриявӣ оид ба гӯштини тарзи озод байни наврасони солҳои таваллудашон 2003-2006 ва 2007-2008 бахшида ба Рӯзи Президенти Ҷумҳурии Тоҷикистон гузаронида шуд.

Бино ба гуфти Ҷамшед Насриддинов, мудири Бахши кор бо ҷавонон ва варзиши ноҳияи Ашт, мақсад аз баргузории мусобиқа тарғибу ташвиқи гӯштини тарзи озод байни наврасон, мустаҳкам намудани алоқаи дӯстӣ байни варзишгарон, баланд бардоштани маҳорати касбии варзишгарон ва муайян намудани узви дастаи мунтахаби Ҷумҳурии Тоҷикистон мебошад.

Дар мусобиқаи мазкур ғолибон ва ҷоизадорони мусобиқаи вилоятӣ, шаҳрӣ, ноҳиявӣ, минтақавӣ ва шаҳру ноҳияҳои тобеи ҷумҳурӣ иштирок намуданд. Дар маҷмуъ 130 нафар варзишгарони наврас иштирок ва барои мақомҳои ифтихорӣ қувваозмоӣ намуданд.

Пас аз қувваозмоиҳо ғолибон муайян гардида, дар охир онҳо бо медал ва дипломи Кумитаи кор бо ҷавонон ва варзиши назди Ҳукумати ҷумҳурӣ сарфароз гардонида шуданд.