18-уми феврали соли ҷорӣ Муассисаи давлатии “Маркази такмили ихтисоси кормандони соҳаи тарбияи ҷисмонӣ ва варзиш”, ки дар назди Кумитаи кор бо ҷавонон ва варзиши назди Ҳукумати ҷумҳурӣ ташкил шудааст, кори худро шуруъ намуд.

Муассиса дар нахустин курси худ 20 нафар мутахассисони соҳаро даъват намудааст. Бино ба иттилои директори муассиса Фируз Юсуфзода дар курси такмили ихтисоси кормандони соҳаи тарбияи ҷисмонӣ ва варзиш директорони мактабҳои варзишии ҷумҳурӣ аз шаҳри Душанбе, ВМКБ, Суғду Хатлон ва шаҳру ноҳияҳои тобеи марказ ширкат доранд.

Раиси Кумитаи кор бо ҷавонон ва варзиш Аҳтам Абдуллозода аз рафти курс дидан намуда бо мутахассисони соҳа ҳамсуҳбат шуда иброз дошт, ки:

“Бо дастгириҳои бевоситаи Роҳбарияти кишвар, Пешвои миллат муҳтарам Эмомалӣ Раҳмон имрӯзҳо барои рушд ва инкишофи соҳаи тарбияи ҷисмонӣ ва варзиш, баланд бардоштани сатҳи касбияти мураббиёну масъулини соҳа, машқу тамрин ва азхуднамоии усулҳои нави варзиш дар Ҷумҳурии Тоҷикистон тамоми шароит фароҳам оварда шудааст,” - гуфт Аҳтам Абдулозода.

Соҳаи тарбияи ҷисмонӣ ва варзиш дар баробари дигар соҳаҳо яке аз самтҳои афзалиятноки сиёсати иҷтимоии Ҳукумати кишвар ба ҳисоб рафта, дар давоми 27 соли истиқлолият ин соҳа дар кишвар ба таври бесобиқа рушд ёфт. Маҳз дар ин давра бо сиёсати созандаю бунёдкоронаи Ҳукумати кишвар, хусусан ҷаҳду талошҳои Пешвои муаззами миллат муҳтарам Эмомалӣ Раҳмон ба хотири таъмини оммавияти варзиш, таҳкими тарзи ҳаёти солим, мусоидат ба омодакунии варзишгарони касбии тоҷик заминаи мусоид фароҳам оварда шудааст.

Имрӯз барои рӯ овардан ба ҷаҳонӣ варзиши муосир моро мутахассисони пуртаҷрибаву бомаҳорат зарур аст. Алалхусус роҳбарияти муассисаву тарбиятгирандагони соҳаи варзиш бояд дар раддифи мутахассисони байналмилалӣ бошанд. Ин мушкилиҳоро ба назар гирифта Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни суханронӣ дар Ассамблеяи XVII генералии Кумитаи миллии олимпӣ ва мулоқот бо масъулини соҳаи варзиш 14 феврали соли 2018 баён доштанд: “Баҳри баланд бардоштани соҳаи тарбияи ҷисмонӣ ва варзиш дар кишвар Муассисаи давлатии “Маркази такмили ихтисоси кормандони соҳаи тарбияи ҷисмонӣ ва варзиш” таъсис дода шавад”.

Муассисаи давлатии “Маркази такмили ихтисоси кормандони соҳаи тарбияи ҷисмонӣ ва варзиш” 31 июли соли 2018 дар заминаи дастури Президенти Ҷумҳурии Тоҷикистон муҳтарам Эмомалӣ Раҳмон таъсис дода шуд.

Фируз Юсуфзода, директори муассиса таъсис гардидани чунин муассисаро ба маврид дониста, изҳор дошт:

“Мақсади асосии фаъолияти муассиса ин баланд бардоштани дониши касбии мутахассисон, мукаммал гардонидани сифати касбияти онҳо, тайёр намудан ба иҷрои вазифа ва функсияҳои муосири меҳнат, инчунин ташкили низоми роҳнамоии методӣ ва методӣ - илмии тайёрии варзишӣ дар ҳудуди Ҷумҳурии Тоҷикистон мебошад. Нақша дорем, ки дар як сол 20 курс гузаронида, 234 нафар мутахассисони соҳаро барои баланд бардоштани равияи донишу таҷриба ҷалб намоем. Инчунин дар оянда нақша дорем, ки курсҳои сайёҳӣ ташкил намуда, мутахассисони хориҷиро даъват кунем”.

Ёдовар мешавем, ки курси такмили ихтисоси кормандони соҳаи тарбияи ҷисмонӣ ва варзиш то 2 марти соли 2019 идома ёфта, дар анҷом ба иштирокчиён сертификат супорида мешавад.