Дар доираи сафари кории Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба шаҳру ноҳияҳои вилояти Суғд дар як қатор деҳаҳои ноҳияи Айнӣ иншооти варзишӣ ба истифода дода шуд.

Дар ин бора аз Мақомоти иҷроияи ҳокимияти давлатии ноҳия иттилоъ дода, илова намуданд, ки иншооти нави варзишӣ дар заминаи дастуру супоришҳои Сарвари давлат муҳтарам Эмомалӣ Раҳмон ба истиқболи ҷашни фархундаи миллӣ-35-солагии Истиқлоли давлатӣ бунёд гардидааст.

Дар шаҳраки Ревади Ҷамоати деҳоти Урметан маҷмааи нави варзишӣ бо харҷи 1 миллион 300 ҳазор сомонӣ сохта, мавриди истифода қарор дода шуд. Гуфта мешавад, ки он майдончаҳо барои бозии футбол, баскетбол ва волейбол, ҷой барои машқҳои тарбияи ҷисмонӣ ва дигар инфрасохтори зарурии варзишӣ бунёд шудааст, ки барои баргузории мусобиқаҳо ва машғулиятҳои мунтазами варзишӣ имконият фароҳам меорад.

Маҷмааи нави варзишӣ, ки дар деҳаи Ҳайронбед ифтитоҳ гардидааст, бо саҳми соҳибкорон ва аҳолии маҳал сохта шуда, барои бунёди иншоот 4,5 миллион сомонӣ маблағ равона гардидааст ва ин аз саҳми арзандаи соҳибкорону аҳолӣ дар корҳои ободониву созандагии ноҳия шаҳодат медиҳад.

Дар маҷмаа ҳавзи шиноварӣ, нуқтаи санитарию беҳдоштӣ, толори варзишӣ, ҳуҷраҳои корӣ ҷой дода шуда, имкон медиҳад, ки сокинон, бахусус наврасону ҷавонон аз имкониятҳои муосири варзишӣ самаранок истифода намоянд.

Дар доираи тадбирҳои ободонӣ дар деҳаи Шаватки Болои Ҷамоати деҳоти Рарз майдончаи нави варзишӣ, ки дар масоҳати 968 метри мураббаъ бунёд гардидаааст, мавриди истифода қарор гирифт.

Фармоишгари иншоот Мақомоти иҷроияи ҳокимияти давлатии ноҳияи Айнӣ дар ҳамкорӣ бо сокинони маҳал буда, корҳои сохтмонӣ тариқи ҳашар бо иштироки фаъоли аҳолии деҳа анҷом дода шудаанд. Барои бунёди майдончаи варзишӣ 380 ҳазор сомонӣ маблағ сарф шудааст.

Сокинони деҳаи Рарз ҳам соҳиби майдончаи нави варзишӣ гардиданд. Иншооти нави соҳаи варзиш бо саҳми Мақомоти иҷроияи ҳокимияти давлатии ноҳия дар ҳамкорӣ бо аҳолӣ ва бо харҷи 1,3 миллион сомонӣ бунёд гардидааст.

Дар деҳаҳои Марғзор, Пете ва Вешаби ноҳия майдончаҳои нави варзишӣ мавриди истифода қарор гирифтанд, ки ин тасмим ба рушди соҳаи варзиш, оммавияти он ва солимии ҷомеа нигаронида шудааст.

Дар партави ҳидоятҳои Пешвои миллат муҳтарам Эмомалӣ Раҳмон дар шаҳраки Зарафшон бо саҳми Корхонаи фаръии “Шахтаи Фон-Яғноб” майдончаи варзишии замонавӣ сохта, мавриди баҳрабардорӣ қарор дода шуд. Гуфта мешавад, ки барои иҷрои корҳои сохтмонӣ 620 ҳазор сомонӣ маблағ равона гардидааст.

Ин ҳама корҳои ободониву созандагиро сокинони ноҳияи Айнӣ самараи Истиқлоли давлатӣ, таваҷҷуҳи хоссаи Сарвари давлат муҳтарам Эмомалӣ Раҳмон ба рушди соҳаи варзиш ва саҳмгузории соҳибкорону сокинон дар ободии диёр маънидод мекунанд.

Субҳиддин ҚОДИРОВ, “ҶТ”