Бозии ифтитоҳии мусобиқоти қаҳрамонии футболи Аврупо-2024 миёни тимҳои мунтахаби Олмон ва Шотландия рӯзи ҷумъа, 14 июн дар варзишгоҳи “Аллианз Арена”-и Мюнхен баргузор мегардад.

Бозиҳои марҳилаи гурӯҳии Чемпионати Аврупо то 26 июн идома карда, рақобатҳои 1/8 ниҳоӣ бошад, аз 29 июн то 2 июл доир мегарданд. Бозиҳои чорякфинал 5 ва 6 июл, бозиҳои ниманиҳоӣ 9 ва 10 июл баргузор мешаванд. Вохурии финалӣ 14 июл қарор аст дар “Олимпиастадион”-и Берлин баргузор шавад.

Бояд гуфт, ки чемпиони кунунии Аврупо тими мунтахаби Италия мебошад, ки дар финал соли 2020 тими Англияро пас аз силсилазарбаҳои пеналтӣ бо натиҷаи 3:2 мағлуб намуда буд.

Мувофиқи маълумоти УЕФА, фонди ҷоизавии Евро-2024 дар муқоиса бо Евро-2020 бетағйир монда, 331 миллион евроро ташкил медиҳад, ки нақшаи тақсими ҷоиза чунин аст: барои ширкат дар мусобиқа ҳар як даста 9,25 миллион евро, барои пирӯзӣ дар ин бозӣ - 1,0 миллион евро, барои мусовӣ - 500 ҳазор евро, барои роҳхат ба даври 1/8 финал - 1,5 миллион евро, барои ба чорякфинал баромадан - 2,5 миллион евро, барои ба даври ниманиҳоӣ баромадан - 4 миллион евро ва Чемпиони Аврупо-2024 маблағи иловагӣ ба миқдори 5 миллион евро мегирад. Маблағи ҳадди аксаре, ки дастаи қаҳрамон дар ҳар се бозӣ дар гурӯҳи худ ғолиб меояд, 28,25 миллион евро хоҳад гирифт.