Ё ин навъи варзиш дар Тоҷикистон то куҷо рушд кардааст?

Ҳоло дар кишвари мо намуди варзиши баскетбол рушду равнақ ёфта, ҳамасола варзишгарони тоҷик аз ин ришта дар мусобиқаҳои байналмилалӣ иштирок менамоянд. Барои таҳлилу баррасии фаъолияти Федератсияи баскетболи Ҷумҳурии Тоҷикистон бо Саид Холов, президенти федератсияи мазкур суҳбат оростем, ки фишурдаи он пешкаш мегардад.

- Соли 2021 барои Федератсияи баскетболи Ҷумҳурии Тоҷикистон чӣ гуна сол буд? Ба чӣ комёбиҳо расидед?

- Соли 2021 барои Федератсияи баскетболи кишвар соли хубу пурбарор буд. Ҳарчанд дар давраи бемории сироятии COVID- 19 дар соли 2020 ва паёмадҳои он ба соли 2021 нақшаи кории федератсия нисбат ба солҳои қаблӣ маҳдуд гардида буд, вале бо вуҷуди ин варзишгарони мо тавонистанд, натиҷаҳои хубро ба даст оранд. Бо дастгирии Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва сохторҳои маҳаллии он чорабиниҳои дар нақшаи кории федератсия барои соли 2021 пешбинӣ гардида, амалӣ шуданд. Аз чорабиниҳои пешбинигардида, танҳо иштироки варзишгарон дар чорабиниҳои байналмилалӣ бо сабаби мавқуф гузоштани баргузории онҳо амалӣ нашуданд.

- Оё варзишгароне, ки дар мусобиқаҳои фароҷумҳурӣ сазовори ҷойҳои намоён гаштаанд, аз ҷониби федератсия дастгирӣ меёбанд?

- Албатта, Федератсияи бас-кетболи Ҷумҳурии Тоҷикистон аз рӯи имконияташ доимо варзишгароне, ки воқеан лаёқатманданд ва инчунин камбизоатанд, дастгирӣ менамояд. Масалан, маблағи таҳсили чанд нафар варзишгаронро дар мактабҳои олии кишвар пардохт намудему мунтазам ба онҳо лавозимоти касбии баскетбол ҷудо менамоем. Бо ҷалби сарпарастон сафари хориҷии онҳоро барои иштирок дар мусобиқаҳои байналмилалӣ пурра маблағгузорӣ менамоем. Варзишгароне, ки дар мусобиқаҳои фароҷумҳурӣ дастболо гардидаанд, мо онҳоро ҳатман ҳавасманд мегардонем. Ҳам аз ҷониби федератсия ва ҳам аз ҷониби Кумитаи кор бо ҷавонон ва варзиш бо туҳфаҳо қадрдонӣ карда мешаванд.

- Чаро варзишгарони ин риштаро дар мусобиқаҳои байналмилалӣ кам мебинем?

- Дуруст қайд кардед. Воқеан ду соли охир варзишгарони мо дар мусобиқаҳои байналмилалӣ кам ширкат намуданд. Бинобар бемории сироятии COVID-19 Федератсияи баскетболи Ҷумҳурии Тоҷикистон бо як қатор мушкилиҳо рӯ ба рӯ шуд. Варзишгарон ва мураббиёни мо имконияти сафарбар шуданро ба давлатҳои ҳамсоя бо мақсади баланд бардоштани маҳорати хеш аз даст доданд. То давраи COVID-19 ҳамасола варзишгарони федератсия дар чандин мусобиқаҳои байналмилалӣ иштирок намудаанд. Зеро иштирок дар чунин чорабиниҳо барои баланд гардидани малакаи варзишгарон заминаи хуб мегузорад.

- Баскетболбозони беҳтари-ни мо айни замон киҳоянд?

- Баскетболбозони мо айни замон Далерҷони Ҳайдар, Зафари Худойназар, Илҳом Лутфулоев ва Тимур Пулотов маҳсуб меёбанд, ки дар Федератсияи баскетболи Ҷумҳурии Тоҷикистон сабт гардидаанд. Ва аз рӯйи риштаи баскетбол дар мусобиқаҳои чӣ дохиливу чӣ фароҷумҳурӣ баромад менамоянду натиҷаҳои назарас ба даст меоранд, ки ин боиси ифтихори ҳам федератсияи баскетбол ва ҳам ифтихори кулли мардуми сарбаланди кишвари маҳбубамон мебошад.

- Ҳар сол дар кишвар чанд мусобиқаи ҷумҳуриявӣ оид ба баскетбол доир мегардад?

- Соли 2021 федератсия якчанд мусобиқаи сатҳи байналмилалиро дар шаҳри Душанбе ва дигар минтақаҳои кишвар роҳандозӣ намуд.
Аз ҷумла, соли 2021 дар нақшаи кории федератсия баргузории 8 мусобиқаи сатҳи ҷумҳуриявӣ буд, ки гузаронида шуд ва натиҷаҳои хуб ба бор овард. Яке аз мусобиқаҳо оид ба баскетбол дар доираи бозиҳои варзишии Тоҷикистон-2021 ба ифтихори 30-солагии Истиқлоли давлатии Тоҷикистон дар шаҳри Душанбе баргузор гардид. Дар мусобиқаи мазкур 8 даста – Душанбе-1, Душанбе-2, Хатлон-1, Хатлон-2, Суғд-1, Суғд-2, ВМКБ ва ШНТМ нахуст дар ду гурӯҳ бозӣ карданд. Гурӯҳи А – Душанбе-1, Душанбе-2, Хатлон-2, Суғд-2 Гурӯҳи Б – ВМКБ, Хатлон-1, Суғд-1, ШНТМ.

Дастаҳои Душанбе-1, Душанбе-2 аз гурӯҳи “А”, Суғд-1, ВМКБ аз гурӯҳи “Б” дар нимфинал бозиҳояшонро идома доданд. Дар ин давр Душанбе-1 дастаи Суғд-1-ро бо ҳисоби 114:54 ва Душанбе-2 дастаи ВМКБ-ро бо ҳисоби 77:65 мағлуб намуда, ба даври ниҳоӣ роҳ ёфтанд.

Дар даври ниҳоӣ дастаи Душанбе-1 бар дастаи Душанбе-2 бо ҳисоби 80:73 пирӯз шуда, ғолиби мусобиқа гардид.

- Имрӯз федератсия чӣ мушкилӣ дорад?

- Имрӯзҳо Федератсияи баскетболи Ҷумҳурии Тоҷикистон ба сарпарастон эҳтиёҷ дорад. Агар сарпарастон зиёд бошанд, мо зиёдтар дар мусобиқаҳои байналмилалӣ иштирок мекунем. Чун федератсия дар танҳоӣ наметавонад варзишгаронашро ҳамаҷиҳата дастгирӣ намояд.

- Шумо ҳамчун роҳбари федератсия аз дастовардҳои варзишгарон қаноатмандед?

- Нисбат ба солҳои қаблӣ сатҳ ва натиҷаи баромади варзишгарон дар риштаи баскетбол беҳтар шуда истодааст, вале ин дастовардҳо моро қаноатманд карда наметавонад. Мо бояд аз ин ҳам беҳтару хубтар дар мусобиқаҳои байналмилалӣ баромад намуда, номбардори Ватану миллати хеш гардем.

- Дар оянда федератсия чӣ нақшаҳо дорад?

- Федератсияи баскетболи Ҷумҳурии Тоҷикистон дар оянда нақшаҳои зиёд дорад. Федератсия нақша дорад, ки дар шаҳру ноҳияҳо сатҳи касбии мураббиёнро баланд намояд ва дар кишвар доварони дараҷаи байналмилалиро зиёд гардонад. Инчунин нақша дорад, ки мизбони мусобиқаи сатҳи байналмилалӣ оид ба баскетбол дар ҷумҳурӣ гардад.