ВАРЗИШ
Ҷумъа 20 Май 2022 09:24
8509
Миҷгонаро варзиш тарбия кард

Миҷгона Самадова бонуварзишгари ҷавони тоҷик дар Ҷоми ҷаҳон оид ба бокс миёни кишварҳои истеҳсолкунандаи нафт, ки аз санаи 7- ум то 11- уми декабри соли 2021 дар шаҳри Нижневартовски Русия баргузор гардид, ширкат намуд. Дар ин мусобиқа 139 варзишгар аз 16 кишвар иштирок доштанд ва Тоҷикистонро 8 варзишгар намояндагӣ менамуданд, ки яке аз онҳо Миҷгона буд. Миҷгона Самадова дар вазни 57 кило байни бонувон қувваозмоӣ намуда, бо мағлуб намудани ҳарифонаш сазовори медали тилло гардид. Ба шарофати ӯ Парчами Тоҷикистон парафшон шуду Суруди миллӣ садо дод. Перомуни фаъолияти варзишии ин бонуварзишгар суҳбате оростем, ки фишурдаи онро пешкаши хонанда менамоем.

- Миҷгона, дастпӯшакҳоро дидан баробар чӣ ба ёдатон мезанад: муштҳои обдори хӯрдаатон, тамринҳоятон ва ё чизи дигар?

- Баробари дидани дастпӯшакҳо ҳамон машқу тамринҳоям ба ёдам мерасад. Пирӯзӣ дар мусобиқаҳоро бароям ёдоварӣ мекунад. Пеш аз ҳама ваъдаи дар пеши худ ва модарам гузоштаамро, ки дар Бозиҳои олимпӣ сазовори медали тилло гардам, дар назарам ҷилвагар менамояду боз ҳам азмамро қавитар менамояд.

- Кӣ шуморо ба майдони варзиш овард ва чаро маҳз ин намуди варзиши душвор барои бонувонро интихоб намудед?

- Ба дунёи варзиш маро бародарам Давлаталӣ овард ва 14 сол мешавад, ки ба варзиш машғулам. Ман аввалан аз намуди муҳорибаи тан ба тан ва кикбоксинг тамрин мекардам. Баъдан ба таэквондо рағбатам пайдо шуд. Дар мусобиқаҳои дохиливу хориҷӣ аз намуди муҳорибаи тан ба тан 7 сол баромад кардам; чор маротиба қаҳрамони ҷаҳон, ду маротиба қаҳрамони Осиё ва чандин маротиба қаҳрамони Тоҷикистон гардидам. Чун таэквондо ва кикбоксинг ба намуди Бозиҳои олимпӣ дохил намешаванд, ба бокс рӯ овардам.

- Аз аҳли оила кӣ бештар барои ба ин варзиши душвор машғул шуданатон хавотир асту кӣ таҳрикатон медиҳад?

- Модарам ҳамеша рӯҳбаландам мекунад. Дар ҳар мусобиқа дуои модарам пушту паноҳи ман буд. Охирин мусобиқаамро низ ба модарам бахшидам чун аз ҳама зиёд барои ман модарам хавотир мешуд. Дар ҳар мусобиқае, ки зарб мехӯрам, модарам мегӯяд, ки бас кунам ва дигар ба варзиш машғул нашавам. Аммо ба ӯ ваъда додаам, ки бояд ба ҳадафи асосиям расам. Яъне дар олимпиада сазовори медал гардам. Бо вуҷуди хавотириҳои зиёдаш модарам боз дуогӯям аст.

- Барои як бону ба варзиш машғул шудан чӣ мушкилӣ дорад?

- Гумонам ҳеҷ. Барои ман ҳеҷ мушкил надорад. Чун ман қариб ки тамоми вақти худамро ба варзиш бахшидаам. Ба кори хона на он қадар сару кор дорам. Ҳама кори хонаро модарам мекунад ва ӯ намегузорад, ки ман ҳам ба варзиш ва ҳам ба кори хона машғул шавам.

- Муоширати атрофиён бо шумо ҳамчун бонуварзишгар чӣ гуна аст?

- Қариб, ки ба берун намебароям. Чун ҳамеша банд ҳастам. Фақат рӯзҳои истироҳатӣ ба кӯча ё ягон боғи фарҳангӣ рафта истироҳат мекунам. Аз мушоҳидаҳоям муносибати атрофиён ба бонуварзишгарон хуб аст.

- Шавҳари ояндаатонро дорои кадом касб дидан мехоҳед? Варзишгар буданаш шарт аст?

- Аввалан насибу тақдир. Баъдан бароям муҳим нест, ки шавҳари ояндаам дорои кадом касбу ҳунар аст. Фақат инсони хуб бошад, маро фаҳмад, кофист.

- Баъди ба шавҳар баромаданатон, боз ҳамин риштаро идома медиҳед?

- Агар ӯ розӣ бошад, мехоҳам мураббӣ шуда кор кунам.

- Мабодо агар шавҳаратон зид баромад, чӣ кор мекунед?

- Ҳеч. Агар зид бошад, ман аз варзиш даст мекашам. Барои ман оила дар ҷойи аввал меистад.

- Бархӯрди шумо бо писарон дар кӯча чӣ гуна аст? Оё ягон писар дар кӯча лаззати муштҳои Миҷгонаро чашидааст?

- Вақте ки хонандаи мактаби миёна будам, бо писарон бисёр ҷанг мешудам. Бисёри бачаҳоро мезадам. Ва барои ин корам чандин бор маро ба шуъбаи ВКД ноҳияамон бурдаанд. Айни ҳол бошад, бо касе ҷанг намекунам ва ҳеҷ касро нороҳат намекунам. Чун духтари қадрас шудаам ва хиҷолат мекашам.

- Дар ҷодаи интихобнамудаатон саҳми киҳо бештар аст?

- Дар ҷодаи интихобнамудаам саҳми оилаам, саҳми мураббиям Шамсиев Мирзокарим ва талошу заҳматҳои худам низ буд. Яъне ман ҳаматарафа аз ҷониби азизонам дасгирӣ меёфтам. Аз минбари рӯзномаи “Ҷавонони Тоҷикистон” миннатдории худамро ба аҳли оилаам ва мураббиям Шамсиев Мирзокарим мерасонам.

 Маҳз дастгириҳои онҳо буд, ки ман имрӯз шаҳди пирӯзӣ чашида истодаам. Инчунин аз бародарам низ ҷиҳати дастгириҳояш миннатдорам.

- Дар мусобиқаи байналмилалии Ҷоми ҷаҳон оид ба бокс, ки миёни кишварҳои истеҳсолкунандаи нефт баргузор гардид, ҳарифи пурқуввати шумо кӣ буд?

- Ба хотири Ватани азизам тамоми қувваамро истифода намуда, дар мусобиқаи байналмилалии Ҷоми ҷаҳон оид ба бокс дастболо шудам. Ва дар он ҷо ҳарифи пурқудрат бароям варзишгардухтари муғулистонӣ - Мунгунсаран Балсан буд. Ман хуб медонистам, ки ӯ бисёр боқувват аст. Чун пеш аз иштирок дар мусобиқа дар бораи ӯ аз шабакаҳои интернетӣ маълумот гирифтам. Албатта дар аввал ҳисси тарсу ҳарос маро фаро гирифта буд, аммо дуои модарам ва халқи азизам ба ман қувват мебахшид. Хушбахтона, тавонистам, ба рақибонам пирӯз гардам ва медали тиллоро ба гардан овехта, Парчами Тоҷикистони азизро боло намоям.

- Миҷгона ба ғайр аз варзиш боз чӣ ҳунар дорад?

- Дар баробари ба варзиш машғул шудан, таҳсил ҳам мекунам. Айни ҳол дар курси 5-и факултети ҳуқуқшиносӣ таҳсил дорам.

- Барои омода шудан дар сатҳи Бозиҳои олимпӣ барои муштзанони тоҷик чӣ намерасад?

- Барои омода шудан ба Бозиҳои олимпӣ мусобиқаҳо дар дохили кишварамон зиёд бошад, хуб мешавад, то мо бис-ёртар тамрин кунем. Бисёртар машқҳои дастаҷамъона бо дигар давлатҳо шавад, то тавонем таҷрибаи худро зиёд кунем. Ҳар як варзишгар бояд пеш аз оне, ки ба мусобиқаҳои ҷаҳонӣ мебарояд, бояд тайёрии хуб дошта бошад. Машқу тамринҳои зиёд кунад.

- Ба бонуварзишгарон чӣ гуфтаниҳо доред?

- Ба ҳаводорони варзиш, махсусан ба бонуварзишгарон саломатӣ хоҳонам. Ба духтароне, ки дӯстдори варзиш ҳастанд, гуфтаниям, ки ҷаҳду талош намоянд ва дар қатори писарон дар толорҳои варзишӣ ба тамрин машғул шаванд, то кишвари азизамонро дар арсаи байналмилалӣ муаррифӣ карда тавонанд.

- Ташаккури зиёд барои як суҳбати самимӣ!

- Саломат бошед!

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
25 26 27 28 29 30 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

Май 2022 c.