ВАРЗИШ
Чоршанбе 14 Апрел 2021 09:34
7854
Бо ба даст овардани Истиқлолияти давлатӣ соҳаи варзиш дар мамлакат ба тадриҷ рушд ёфта, дар як марҳилаи кӯтоҳи таърих варзишгарони муваффақи кишвар бо натиҷаҳои назаррасу арзандаи худ борҳо шарафу номуси миллатро миёни оламиён боло бардоштаанд. Махсусан тайи ин даҳсолаи охир соҳаи футбол бисёр ҳам рушду равнақ ёфта, дастаҳои мунтахаби кишвар бо натиҷаҳои арзандаву муваффақиятҳои бадастовардаашон борҳо шарафи Тоҷикистонро на танҳо дар минтақа, балки дар сатҳи ҷаҳонӣ боло бардоштаанду ватани маҳбубамонро муаррифӣ намуданд.

Мунтахаби наврасони то 17-сола аз 30 январ то 6 феврали соли ҷорӣ дар мусобиқаи байналмилалии “Ҷоми рушд-2021”, ки дар шаҳри Минск баргузор гардид, иштирок намуданд ва барандаи ҷоми мусобиқаи мазкур гардиданд. Дар ин росто бо сармураббии даста Аҳлиддин Турдиев суҳбат намудем.

- Ғолибияти навбатиро ба шумо ва ба кулли мардуми шарифи Тоҷикистон табрик менамоем. Назари шумо ба ин мусобиқаи бонуфузи байналмилалӣ чи гуна аст?

- Ростӣ, мо аҳли даста бисёр хушҳол ҳастем, ки дар чунин як мусобиқаи бонуфузе, ки дар сатҳи байналмилалӣ баргузор шуд, барандаи мақоми аввал ва соҳиби ҷоми мусобиқа гардидем. Бояд гуфт, ки натиҷаи ба дастовардаи футболбозони навраси тоҷик натанҳо дар Тоҷикистон, балки дар Осиё худ як дастоварди таърихист, зеро мунтахаби наврасони то 17 – солаи Тоҷикистон аввалин дастае мебошанд, ки дар Осиё барандаи мусобиқаи байналмилалии “Ҷоми рушд – 2021” гардиданд.

- Натиҷаи бадастоварда бозгӯи он аст, ки дар мусобиқа бо як тайёрии ҷиддӣ иштирок намудед. Дар бораи омодагиҳо ва тамринҳои пеш аз мусобиқа мегуфтед...

- Вақте, ки пас аз як соли пурташвиши вабои коронавирус мо ба мусобиқа даъват гардидем, ин моро бисёр хушҳол намуд ва бачаҳо низ аз иштирок дар мусобиқа хеле шод гардиданд. То ин дам мо тамринҳои худро идома медодем, вале пас аз даъват ба мусобиқа бачаҳоро масъулияташон дучанд гардид ва бо як неруи иловагие тамрин мекарданд. Чун ҳамеша дар як рӯз ду маротиба тамрин мегузаронидем, саҳар бештар бо бачаҳо тамринҳои физикиро ба роҳ мемондем ва бегоҳ тактикаву усулҳои зарбазанӣ, тӯбпартоӣ, ҳамлаварӣ ва дигар қоидаҳои футболро омӯзиш мекардем ва кӯшиш менамудем, ки он мушкиливу хатоҳое, ки дар ҷараёни бозӣ аз ҷониби бозингарони мо иттифоқ меуфтоданд, бартараф намоем.

- Мунтахаби наврасони кишвар соли гузашта низ дар мусобиқаи мазкур иштирок намуда буданд. Бо чӣ тафовуте мусобиқаи имсола баргузор гардид?

- Аслан соли гузашта, ки ҳеҷ гуна беморие ҷаҳонро ташвиш намедод, дар мусобиқаи мазкур 8 давлат - Белгия, Финландия, Исландия, Исроил, Беларус, Тоҷикистон, Ӯзбекистон ва Қазоқистон иштирок доштанд ва махсусан он дастаҳое, ки аз давлатҳои аврупоӣ дар ҳамин мусобиқа иштирок менамудуанд, бисёр ҳам ҳарифҳои пурқувват буданд. Имсол, ки бинобар сабаби бемории коронавирус вазъ ҳоло ҳам мураккаб аст, давлатҳои аврупоӣ иштирок надоштанд ва мо тавонистем, ки дар се бозии худ бо ҳисобҳои калон ғолибиятро ба даст биёрем.

- Дар мусобиқаи имсола кадом дастаро ҳарифи асосӣ меҳисобидед?

- Ҳар як дастае, ки иштирокчии мусобиқаҳои байналмилалӣ аст ва аз номи як кишвар баромад мекунад, он дастаи тасодуфӣ нест. Инчунин мо худро пеш аз оғози бозӣ аз ягон даста пас намешуморем ва ё қувваи худро аз дигар дастаҳо пастар донем, балки ҳамеша бо як мақсад ба майдон мебароем, ин ҳам бошад ғалаба.

- Назари мураббиёну футболбозони дигар мунтахабҳо ба футболбозони тоҷик дар аввал чӣ гуна буд ва пас аз поёни мусобиқа чӣ гуна шуд?

- Солҳои пеш мо ба мусобиқаҳои байналмилалӣ сафар мешудем, бархе аз бозингарони давлатҳои Аврупо ба мисли Белгия, Исландия ва Финландия ҳатто намедонистанд, ки Тоҷикистон куҷост ва мунтахаби моро низ дигар хел менигаристанд. Аммо вақте ки мо вориди майдон шудем ва аввалин бозии худро шурӯъ намудем, онҳо дар ҳайрат афтоданд ва ба ҳунарнамоии футболбозони тоҷик таҳсину офарин мехонданд. Дар мусобиқаи гузашта низ намояндагони дигар тимҳо барои харидорӣ намудани футболбозони мо чанд маротиба ҳам муроҷиат карданд ва эҳтимол аст, ки дар оянда бо якчанд нафар аз футболбозони навраси мо шартномаҳо ба имзо расонанд. Ҳатто имрӯз як нафар аз аъзои дастаи мо Алиҷони Айнӣ дар дастаи мунтахаби “Краснодар”-и ФР, ки тамринҳояшон дар шаҳри Туркия ҷараён доранд, қарор дорад ва барои гузариш ва шартнома бастан он ҷо ҳунарнамоӣ мекунад.

- Чуноне, ки ба ҳамагон маълум аст, мунтахаби наврасони кишвар дар мусобиқаҳои сатҳи ҷаҳонӣ низ иштирок намудаанд ва ҳатто соли 2019 тими миллии наврасони то 17-солаи кишвар миёни 45 давлати қитъаи Осиё мақоми дувумро ба даст оварда буданд. Мегуфтед, ки сабаб дар чӣ бошад, ки ҳамин натиҷаҳо дар дигар тимҳои мунтахаби миллӣ ба назар намерасад?

- Ростӣ, дар ин масъала чизе гуфта наметавонам, зеро ман то ҳол бо дигар дастаҳои мунтахаби кишвар кор накардаам. Аммо як чизро бояд ба назар гирифт, ки барои роҳхат гирифтан бояд заҳмат кашид. Инчунин бурду бохти даста аз мураббӣ низ вобастагии калон дорад. Ман фикр мекунам, ки барои дар сатҳи ҷаҳонӣ иштирок кардан, мо бояд бештар заҳмат бикашем, бозиҳои дӯстонаро бо дастаҳои пурқувватар бештар ба роҳ монем ва таҷрибаи давлатҳои пешрафтаро бештар истифода барем.

- Оё мушкиле ҳаст, ки ба пешрафту муваффақияти мунтахаби футболбозони кишвар таъсиргузор бошад?

- Фикр мекунам, баъд аз ин қадар ободиву имкониятҳое, ки махсусан ба футболбозон фароҳам оварда шудааст, думболи мушкиливу норасоӣ гардем, дар шаъни инсонгарӣ рост намеояд. Баръакс мо бояд дар қатори ин ҳама дастгириву ғамхориҳое, ки Ҳукумати мамлакат нисбат ба мо футболбозон менамояд, ҳарчӣ бештар талош варзему бо ҳамон муваффақияту ғолибияти худ қарзи ватандории худро то андозае адо намоем.

- Доир ба нақшаҳои минбаъда чӣ гуфта метавонед?

- Айни замон мо барои дарёфти Ҷоми Федератсияи футболи Тоҷикистон рақобат дорем ва аз натиҷа ҳоло чизе гуфта наметавонам. Инчунин баргузории мусобиқаҳои байналмилалӣ низ пас аз мусобиқаи “Ҷоми рушд - 2021” ҳоло муайян нагардидаанд. Мо тамринҳои ҳамешагии худро идома дода истодаем ва ҳамеша барои иштирок дар мусобиқаҳои берун аз кишвар омодаем.

Қиёмиддин МАҲМАДҶОНОВ, "ҶТ"

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

Апрел 2021 c.