19 августи соли равон Пешвои муаззами миллат муҳтарам Эмомалӣ Раҳмон барои ифтитоҳ ва гузоштани санги асоси як қатор иншооти таъиноташон гуногун, шиносоӣ бо соҳаи кишоварзиву вазъи зиндагии мардум бо сафари корӣ ба Вилояти Мухтори Кӯҳистони Бадахшон ташриф оварданд. Дар ҷараёни сафар Сарвари давлат бо роҳбарону фаъолони вилоят мулоқоти озоду самимӣ анҷом дода, таъкид доштанд, ки дар натиҷаи таваҷҷуҳи доимии давлату Ҳукумати мамлакат ва заҳмату талошҳои ватандӯстонаи мардуми вилоят шаҳру ноҳияҳои он ба таври назаррас обод шуда, сатҳи зиндагии мардум беҳтар шуда истодааст.

Пешвои миллат изҳор дошта буданд, ки маҳз бо мақсади таъмин намудани рушду тараққиёти вилоят асри 21 - асри рушди Бадахшон ва ин минтақаи биҳиштосои кишварро дарвозаи тиллоии Тоҷикистон эълон намуда, бо ҳамин мақсад садҳо нақшаву барномаҳои созандаро амалӣ карда истодаем. Дар робита бо ин ва бардошт аз сафари навбатии Президенти кишвар ба вилоят миёни сокинони касбу кори гуногуни ВМКБ назарпурсӣ гузаронидем, ки фишурдаи онро пешкаши хонандагон менамоем.

Анвар Акрамов,
мудири Шуъбаи рушди иҷтимоӣ ва робита бо ҷомеаи дастгоҳи раиси шаҳри Хоруғ:


- Сафари навбатии Пешвои миллат як таҳаввулоти ҷиддӣ дар пешрафти иҷтимоӣ-иқтисодӣ ва фарҳангиву варзишии шаҳру ноҳияҳои ВМКБ, бахусус маркази маъмурии вилоят шаҳри Хоруғ мебошад.
Имсол боз шаш иншооти ҳаётан муҳим дар маркази вилоят мавриди баҳрабардорӣ қарор гирифт. Ифтитоҳи бинои нави Театри вилоятии мусиқӣ - мазҳакавии ба номи Меҳрубон Назаров бо 1000 ҷой нишаст, Маркази савдои “Нигини Хоруғ”, МТМУ №8 дар маҳаллаи Хоруғи боло, коргоҳи дӯзандагии “Баҳори ишқ”, майдончаи варзишӣ дар маҳаллаи Тирчид ва гузоштани санги асос ба сохтмони пули калони мошингузар аз болои дарёи Ғунд аз ҷумлаи ин иншоотҳо мебошанд. Яъне тавсеаи чунин кору ташаббусҳо ҳадафи чоруми стратегӣ, саноатикунонии босуръати кишварро ҳам таҳким мебахшад.

Насим Саидраҳмонов, сокини ноҳияи Шуғнон:


- Чун ҳамеша бо шукргузорӣ аз ваҳдату истиқлолият мардуми сарбаланди Бадахшон меҳмони олиқадр, Пешвои муаззами миллат муҳтарам Эмомалӣ Раҳмонро бо як самимияти хос истиқбол намуданд.
Сокинон аз бахту иқболи хеш сарфарозанду фараҳбол аз онанд, ки маҳз дар даврони истиқлолият аз ғамхориҳои давлату ҳукумат бархурдор шуда, дар фазои сулҳу оромии кишвари маҳбуб ба созандагию ободкорӣ машғуланд.
Мусаллам аст, ки Пешвои миллат пайваста дар ҳаққи мо - сокинони Бадахшон ғамхорӣ намуда, аз наздик бо зисту зиндагонии мардум шинос шуданд. Ташрифи навбатии Пешвои миллат ба вилоят аз созандагиву ободкорӣ дарак дода, дар арафаи он як қатор иншоотҳои муҳим сохта ба истифода дода шуданд.

Зартогул Хусравбекова, омӯзгор:


- Маълум аст, ки ҳар як ташрифи Пешвои муаззами миллат муҳтарам Эмомалӣ Раҳмон ин ободиву созандагӣ мебошад ва аҳолии вилоят ҳам бевосита аз он руҳу илҳоми тоза мегиранд ва бо неруи нав ба фаъолиятҳои бунёдкорӣ даст мезананд. Бинобар ин, мо аз ҳар сафари Сарвари давлат баҳраву самараи тоза мегирем ва ин воқеият аст.
Ба ҳар як шахси бошуур кофист, ки ба дастуру ҳарфҳои Пешвои миллат гӯш дода, бо дилу нияти пок аз онҳо баҳра гирад. Зеро табиист, ки маҳз аз ҳар як таҳлилу эрод соҳаҳои амалкунандаи кишвар ислоҳ ва рушду такомул ёфта, сатҳу сифати зиндагии мардум боз баландтар мешавад.

Гулҷамол Чоршанбиева, сокини шаҳри Хоруғ:


- Вақте ки Пешвои муаззами миллат бевосита назди мардум меояд, шодиву сарфарозии онҳо дар ҳамбастагӣ ҳадду канор надошта, ҳамаи табақаҳо муштоқи дидори Ҷаноби олиянд ва ин навбат ҳам он дар чеҳраҳои болидаи сокинон ҳувайдо буд.
Мардум аз хурд то бузург ҳатто ба шароиту вақт ва имкониятҳои шахсиву инфиродиашон нигоҳ накарда, якҷоя ба пешвози Роҳбари давлат баромад. Ҳамин аст муҳаббат ба Сарвари давлат, самараи ватандорӣ, соҳибистиқлолӣ ва суботу оромии сартосарии кишвар. Яъне сокинон маҳз ба умеди ояндаи нек ва фардои дурахшон таҳти сарварии фарзанди фарзонаи миллат - Асосгузори сулҳу ваҳдати миллӣ чунин ободиҳоро амалӣ месозанд.

Некбахти Ҷамшедӣ, рӯзноманигор:

- Фаъолиятҳои бунёдӣ ва корҳои созандагӣ дар тамоми кишвар бояд ба таври ҳамешагиву бемамониат тавсеа ёбанд. Инро роҳбарияти олии мамлакат дар ҳар мулоқоту вохӯриҳои худ бо мардум таъкид мекунанд. Аз ин хотир, барои кормандони масъули давлатӣ, намояндагони мақомоти иҷроияи маҳаллии ҳокимияти давлатии шаҳру вилоят ва идораҳои маҳаллӣ лозим аст, ки бундёкориҳоро на фақат дар арафаи ташрифи Пешвои муаззами миллат ба вилоят вусъат бахшанд, балқи ба таври доимӣ ва босифат тезонанд.

Имомёрбек Имомёрбеков, мудири Бахши кор бо ҷавонон ва варзиши шаҳри Хоруғ:

- Имрӯз тағйироти воқеӣ ва рушду пешрафт дар соҳаҳои муайяни вилоят бараъло мушоҳида мешавад. Он иншооти иҷтимоӣ – фарҳангӣ ва варзишие, ки бо дасти мубораки Пешвои миллат дар ҳудуди шаҳр ифтитоҳ шуданду баъзеашон дар ҷараёни азнавсозӣ қарор дошта, хоса дар ҷашни 30-солагии Истиқлолияти давлатии кишвар ба истифода дода мешаванд, умуман беназиранд.
Ин навбат дар доираи сафари корӣ ба шаҳру ноҳияҳои вилоят Президенти Ҷумҳурии Тоҷикистон муҳтарам Эмомалӣ Раҳмон дар маҳаллаи Тирчиди шаҳри Хоруғ майдончаи муосири варзиширо мавриди баҳрабардорӣ қарор доданд. Он яке аз иншооти муосир дар маркази вилоят маҳсуб ёфта, кӯдакону наврасон ва ҷавонони ин маҳалла солҳои зиёд ба чунин иншооти замонавии варзишӣ эҳтиёҷ доштанд.
Ҳоло дар ҳудуди шаҳр сохтмони 13 майдончаи ҳаммонанд дар назар дошта шуда, то ҷашни 30-солагӣ ҳамаи онҳо мавриди баҳрабардорӣ қарор дода хоҳанд шуд.

Сабоҳат Донаёрова, сокини шаҳри Хоруғ:

-Феълан сокинони вилоят, бахусус ҷавонон аллакай дарк намудаанд, ки солим зистану зиндагии шоистаро пеш бурдан, аз аъмоли ҷавонмардист. Маҳз дар замони соҳибистиқлолӣ ҷавонони мо чун пайрави асили Пешвои муаззами миллат ба камол расида, аксарияти онҳо ба илмомӯзиву касбомӯзӣ рӯй овардаанд.
Мувофиқи таҳлилҳои Пешвои миллат дар мулоқоти охир бо роҳбарону фаъолони вилоят солҳои қаблӣ дар вилоят нақшаи даъвати ҷавонон ба сафи Қувваҳои Мусаллаҳ умуман иҷро намегардид. Баъди мулоқоти Роҳбари давлат ва бо дастгирии сокинон нақшаи даъвати тирамоҳии соли 2018 - 107 фоиз, даъвати баҳории соли 2019 дар 3 рӯз 104 фоиз, даъвати тирамоҳии соли 2019 дар 3 рӯз 110 фоиз ва даъвати баҳории соли 2020 дар 1 рӯз 103 фоиз иҷро гардид.