Санаи 12-август, бозиҳои ҷавобии даври 1/8 ниҳоии Ҷоми Тоҷикистон миёни дастаҳои футболи кишвар хотима ёфта, ба даври минбаъда ҳашт даста, 5 тим - “Истиқлол”, “Хатлон”, “Регар-ТадАЗ”, “Барқчӣ” ва “Хуҷанд” аз лигаи олӣ, ду бошгоҳ - “Локомотив-Помир” ва “Душанбе-83” аз лигаи якум ва як дастаи лигаи дуюм “Файзканд” роҳхат ба даст оварданд.

Натиҷаҳои ғайримунтазири рақобатҳо мухлисони футболро ба ҳайрат овард. Дар ин давр дастаи “Файзканд”-и ноҳияи Восеъ намояндаи дастаи лигаи дуюм дар майдони марказии ноҳияи Восеъ тими лигаи олӣ “Панҷшер”-и ноҳияи Ҷалолиддини Балхиро қабул намуда, бозиро 0-0 хотима бахшид.

Бозии аввал дар ноҳияи Ҷалолиддини Балхӣ бо ҳисоби 2:2 хотима ёфта буд. Аз лиҳозе, ки бошгоҳи “Файзканд” дар меҳмонӣ ба дарвозаи ҳарифон ду гол ба ҳадаф расонида буд, ҳаққи ширкат намудан дар даври чорякниҳоиро соҳиб шуд.

Барои футболбозони дастаи “Локомотив-Помир”-и Душанбе бозии ҷавобии на он қадар омад кард. “Локомотив-Помир”дар бозии дуюми ҳаштякниҳоӣ меҳмони тими “Исфара”-и шаҳри Исфара гардида, бо ҳисоби 1-2 бохт. Душанбегиҳо новобаста аз мағлубият бо ҳисоби умумӣ 5-4 мусобиқаро идома медиҳанд.

Қаҳрамони бозӣ миёни дастаҳои “Саройкамар”-и ноҳияи Панҷ ва “Душанбе-83”-и шаҳри Душанбе пас аз ду қисми иловагии рақобат муайян гардид. Вақти асосии дидор бо пирӯзии мизбонон бо ҳисоби 2:1 хотима ёфт. Дастаи “Душанбе-83” бо ҳамин ҳисоб дар хонааш ба рақиб дастбола гардида буд. Барои муайян гардидани ғолиб ду қисми 15-дақиқаӣ таъйин шуд. Футболбозӣ дастаи “Душанбе-83” Калеб Авуку дар дақиқаи 118-уми замони изофӣ голи ҳалталабро вориди дарвозаи ҳариф карда, ба дастааш пирӯзӣ овард.

Дастаи “Барқчӣ”-и шаҳри Ҳисор, ки бо ҳайати асосии тими ҷавонони кишвар мусаллаҳ гардидааст, дар чемпионати кишвар миёни тимҳои лигаи олӣ на он қадар муваффақ мешавад. Футболбозони ин бошгоҳ барои роҳхат гирифтан ба даври 1/8 ниҳоӣ тамоми маҳорату малакашонро истифода бурданд. Бозии аввалинро дар майдони худ гузаронида, бо ҳисоби 3:2 ғалаба намуданд. Дар дидори ҷавобӣ тими “Кӯктош”-и ноҳияи Рӯдакӣ дар Варзишгоҳи “Нефтяник” онҳоро пазируфт. Рақобат миёни дастаҳои лигаи олӣ пуршидат ҷараён гирифта, бо ҳисоби 1:1 ба поён расид.

“Истиқлол”-и шаҳри Душанбе ин навбат ҳарифро бо ҳисоби 5-2 торумор намуд. Бошгоҳи ССКА “Помир”-и шаҳри Душанбе дар меҳмонӣ бо мусовӣ 1-1 рақобатро хотима дода, дар майдони худ ба шикаст рӯ ба рӯ шуданд. Ҳисоби умумии 6:2 ба фоидаи дастаи “Истиқлол”-и шаҳри Душанбе.

Муҳаммадҷон Ҳабибуллоев, сармураббии тими “Регар-ТадАЗ”-и шаҳри Турсунзода аз шогирдонаш чунин натиҷаро интизор набуд. Дастаи “Истаравшан”-и шаҳри Истаравшан, ки дар рақобати аввал 1-0 мағлуб шудааст, дар дидори навбатӣ ба ҳариф бисёр фишор оварда, бо ҳисоби 2:1 ғалаба намуд. Ҳарчанд дар дақиқаи 70-ум Ҳикматулло Расулов ҳамлагари регариҳо аз зарбаи 11-метра истифода бурда натавониста бошад ҳам, як голи дар меҳмонӣ задаи “Регар-ТадАЗ” ба футболбозони Турсунзода имкон дод, ки ба чорякфинал бароянд.

Бошгоҳи “Хатлон”-и шаҳри Бохтар бозии ҷавобиро бо дастаи “Ваҳдат”-и шаҳри Ваҳдат гузаронида, бо ҳисоби мусовии 1:1 ба анҷом расонд. Дидори аввал, ки бо ҳисоби 0:0 хотима ёфта буд, тими “Хатлон” бо задани як голи дар меҳмонӣ ба даври оянда роҳ ёфт.

Дастаи пешсафи вилояти Суғд тими “Хуҷанд”-и шаҳри Хуҷанд бошгоҳи “Сомон”-и ноҳияи Данғараро бо натиҷаи 3-0 шикаст дода, аз рӯи натиҷаи ду бозӣ бо ҳисоби 7-1 ба даври минбаъда роҳ пеш гирифт.

Дастаҳо дар даври чорякфинал бо ин ҳарифон рақобат мекунанд:

“Истиқлол” - “Локомотив-Помир”

“Файзканд” - “Душанбе-83”,

“Хатлон” - “Регар-ТадАЗ”

“Барқчӣ” - “Хуҷанд”



Бозии финалии Ҷоми Тоҷикистон 20-уми октябри соли равон дар Варзишгоҳи марказии шаҳри Ваҳдат баргузор хоҳад гашт. 

Маврид ба зикр аст, ки ғолиби Ҷоми Тоҷикистон-2018 ҳаққи ширкат дар Ҷоми КФО (Конфедератсияи футболи Осиё)-2019-ро соҳиб мегардад.

Мусобиқаи Ҷоми Тоҷикистон аз соли 1992 дар кишвар маротибаи 27-ум аст, ки баргузор мегардад. То имрӯз Ҷомро даҳ даста ба даст овардааст. Тимҳои “Регар-ТадАЗ”-и шаҳри Турсунзода ва “Истиқлол”-и шаҳри Душанбе шашмаротибагӣ Ҷоми Тоҷикистонро соҳиб шуда, садрнишини ин мусобиқа ба ҳисоб мераванд. Дастаи “Хуҷанд”-и шаҳри Хуҷанд чор маротиба, “Вахш”-и Қӯрғонтеппа, “Варзоб”-и Душанбе ва “Парвоз” (собиқ “Авиатор”)-и Бобоҷон Ғафуров дуборӣ, “Помир”-и Душанбе, “Ситора”-и Душанбе, “Равшан”-и Кӯлоб ва “Пахтакор”-и ноҳияи Ҷаббор Расулов якборӣ Ҷоми Тоҷикистонро соҳиб гаштаанд.