Имрӯз бахшида ба Рӯзи Парчами давлатии Ҷумҳурии Тоҷикистон сокинони пойтахт баҳри иштирок дар чорабиниҳои оммавӣ-варзишӣ – мусобиқаи велосипедронӣ ва дави миллӣ, ки соати 12-и имрӯз аз назди чорроҳаи Боғи “Хайём” (майдони Товус) оғоз шуд, ҷамъ омаданд.

Иштирокчиёни мусобиқаҳо бо як рӯҳияи болида баҳри арҷ гузоштан ба муқаддасоти миллии кишвар – Парчами давлатӣ бо лавҳаву овезаҳои варзишӣ, зери шиори “Парчамат бодо парафшон, Тоҷикистонам” ширкат варзиданд.

Мусобиқаи веласипедронӣ аз чорроҳаи Боғи “Хайём” (майдони Товус) оғоз гардида, то Наврӯзгоҳ дар масофаи 3,5 км баргузор шуд. Дар он зиёда аз 2 ҳазор велосипедронон иштирок намуданд.

Баъди гузаронидани мусобиқаи велосипедронӣ дар масофаи мазкур наздики 10 ҳазор нафар варзишгарону ҷавонон ва сокинони шаҳри Душанбе баҳри таҳкими тарзи ҳаёти солим, рушду инкишофи соҳаи варзиш ва оммавияти он, инчунин, саҳм гузоштан дар рушди варзиши кишвар дар мусобиқаи дави миллӣ низ фаъолона иштирок намуданд.

Мусобиқаҳои мазкур мисли мусобиқаҳои қаблӣ набуд. Аз ин рӯ, сокинони варзишдӯси шаҳри Душанбе на ба хотири туҳфаю медалҳо, балки баҳри арҷгузорӣ ба Парчами Тоҷикистони соҳибистиқлол ва тарғиби тарзи ҳайёти солим ширкат варзиданд.

Иқдоми мазкур бо ташаббуси Кумитаи кор бо ҷавонон ва варзиш дар ҳамкорӣ бо Мақомоти иҷроияи ҳокимияти давлатии шаҳри Душанбе, Федератсияи футболи Тоҷикистон ва Кумитаи миллии олимпии кишвар, бахшида ба Рӯзи Парчами давлатии Ҷумҳурии Тоҷикистон баргузор гардид.

Ба иштирокчиёни фаъоли мусобиқаҳои мазкур аз тарафи Кумитаи кор бо ҷавонон ва варзиши назди Ҳукумати ҷумҳурӣ ифтихорнома супорида шуд.