Баҳодур Усмонов муштзани тоҷик дар 40-ум Мусобиқаи байналмилалии бокс дар Финландия ба хотираи Гуннар Барлунд, ки бо тахаллуси GeeBee маъруф аст, ҳамаи ҳарифонашро шикаст дода, сазовори ҷойи аввал ва медали тиллои мусобиқа гардид.

Дар ин бора Кумитаи миллии олимпии Тоҷикистон иттилоъ додааст.

Муштзани тоҷик дар вазни -63,5кг муҳорибаро аз чорякфинал оғоз намуда, бар намояндаи Арманистон Ҳамлет Мнатсаканян бо ҳисоби 5:0 пирӯзӣ ба даст овард. Дар нимфинал ҳарифаш аз Венгрия Ричард Ковачро бо ҳисоби 3:2 шикаст дода, дар финал бар варзишгари Шотландия Риси Лунч бо ҳисоби 4:1 ғалаба намуда, медали тиллоро ба гардан овехт.

Мусобиқаи “GeeВee Boxing Tournament-2022” бо иштироки беш аз 100 варзишгар аз кишварҳои Финландия, Норвегия, Шведсия, Эстония, Англия, Уэлс, Шотландия, Тоҷикистон, Қазоқистон, Арманистон, Венгрия, Фаронса, Олмон, Булғористон ва Украина рӯзҳои 7 -10 апрел дар шаҳри Хелсинкӣ баргузор гардида, муҳорибаҳо аз рӯи 4 вазн миёни бонувон ва 11 вазн миёни мардҳо сурат гирифтанд.

“ҶТ”