Оскар Де Ла Ҳойя муштзани мексикоиест, ки солҳои сол рӯйи шонааш парчами Амрико парафшонӣ мекарду дар масири бокс мушташ пайваста амиқу нишонрас буд. Оскар рақибони мағлубнашавандаро торумор мекарду аз хеш бути руёҳои ҳазорон касро месохт. Ӯ мекӯшид мағлубшаванда бошад, аммо фаромушшаванда не. Маҳз ҳамин марому мақсад буд, ки то кунун дар олами бокс аз ӯ ба некӣ ёд мекунанд.

КӮДАКӢ ВА ҶАВОНӢ

Оскар 4 феврали соли 1973 дар шаҳри Монтебеллои штати Калифорнияи Амрико ба дунё омадааст. Агар маҳорати муштзании Оскарро ирсӣ унвон диҳем, иштибоҳе нахоҳем кард, зеро бобои варзишгар Висенте, падараш Ҷоэл ва бародарбузургаш Де Ла Ҳойяи ҳамагӣ муштзанони касбӣ буданд. Бобояш қаҳрамони чандкаратаи Мексика буд.

Оскар тамрин дар олами варзишро на аз бокс, балки аз бейсбол ва скейтборд оғоз намуда, ин навъ бозиҳо писандатарин шуғли даврони кӯдакиаш маҳсуб мегардид. Аммо пайвандон, хусусан падараш таваҷҷуҳи Оскарро ба бокс бештар ҷалб мекард. Падараш дарк мекард, ки писараш бо дасти чап хуб кор мекунад ва ба ҳамин хотир бисёртар чи гуна зарба задан аз ин мавқеъро ба ӯ таълим медод.

ПИСАРИ ТИЛЛОӢ

Заҳмату кӯшиш ва умедвориҳои падар ба зудӣ самар овард. Оскар дар 15-солагӣ унвони қаҳрамони бокси наврасони ИМА-ро гирифта, пас аз як сол ғолиби мусобиқаи “Дастпӯшҳои тиллоӣ” гардид. Баъд аз муваффақиятҳои аввалин Де Ла Ҳойяро имтиҳони бузургу сангин дар роҳ буд, яъне баромад дар Бозиҳои олимпии Барселона - 1992.

Баромади Оскар дар Бозиҳои олимпӣ хеле хуб буд. Дар финал рӯёрӯи Оскар навраси ботаҷриба ва чемпиони ҷаҳон (Австралия 1991) Марко Рудолф қарор дошт. Рақобати Де Ла Ҳойя ва Рудолф тезу тунд идома мекард. Ниҳоят, Оскар ғолиб эълон гардид ва қаҳрамони Бозиҳои олимпӣ шуд. Дар баробари ин, тахаллуси “Писари тиллоӣ”-ро низ гирифт. Оскар ин пирӯзиро ба модараш бахшид, ки соли 1990 аз бемории саратон даргузашта буд. Модар орзу дошт, ки рӯзе писараш қаҳрамони олимпӣ шавад ва ҷавон умеди падару модарро он замон бароварда кард, аммо танҳо падараш шоҳиди пирӯзии писар буд. Пас аз солҳо, ки Де Ла Ҳойя дар олами бокс нуфузу шуҳрат пайдо кард, ба хотири модари марҳумаш маркази саратоншиносиро бунёд кард.

БОКСИ КАСБӢ

Дар солҳои аввали фаъолияти касбии худ Оскар натиҷаи назаррас нишон дод. Ӯ аввалин рақиби хеш - қаҳрамони WBO дар вазни сабук, Хорхе Паезро соли 1994 дар пайти дуввум мағлуб намуда, худи ҳамон мавсим дар муқобили муштзани дигар Рафаэл Руэлас низ пирӯз шуд.

Соли 1996 Оскар Хулио Сезар Чавесро бо накаути техникӣ мағлуб намуд.Тибқи баъзе гуфтаҳо дар ин мубориза Де Ла Ҳойя рақибро нафас рост кардан намондааст, ҳарчанд ки вай қабл аз шуруи рақобат ба мушкилиҳои ҷиддӣ рӯ ба рӯ гардида буд. Аввалан, Чавес бути кӯдакии Оскар буд ва дуввум, Хулио Сезарро на танҳо дар Мексика, балки дар Амрико ҳам дастгирӣ мекарданд. Матбуот бо ҳар роҳ рақибро ситоиш карда, Оскарро масхара мекард, ки ин аз ҷиҳати равонӣ ба ӯ таъсири манфӣ мерасонид. Вале бо вуҷуди ин ҳама ӯ машҳуртарин муштзани замони хешро мағлуб намуд.

Соли 1997, Де Ла Ҳойя ба вазни ниммиёна гузашт ва дар як рақобати 12 раунда Пернелл Уитакерро аз рӯи холҳо мағлуб кард. Пас аз ин ӯ дар мубориза барои камарбанди қаҳрамонии WBC бар Ҳектор Камачо пирӯз шуда, баъд аз як сол камарбанди мазкурро бо ғолиб омадан ба муқобили Айк Куарти низ соҳиб шуд.

МУБОРИЗАИ ҲАЗОРСОЛА

Рақобати соли 1999 дар ВАО-и ҷаҳонӣ таблиғи васеъ пайдо кард, ки рекорди фурӯши чиптаҳоро шикаст ва унвони "Муборизаи ҳазорсола"-ро гирифт. Рӯзи 18-уми сентябр дар Лас-Вегас ду қаҳрамони ҷаҳон оид ба категорияҳои WBC ва IBF - Де Ла Ҳойя ва Феликс Тринидад вохӯрданд. Мусобиқа 12 раунд давом кард. Оскар, ки дар оғози рақобат пешсаф буд, аммо ғайриинтизор бо натиҷаи ками холҳо пас аз 31 рақобати бебохт ба шикаст мувоҷеҳ шуд. Вале дар соли 2000-ум муштзан иштибоҳи хешро ҷуброн кард ва барои дигарбора ба даст овардани камарбанди WBC бо Деррик Коли мубориза бурда, ӯро мағлуб намуд.

Соли 2001 барои Де Ла Ҳойя мубориза бо Шейн Мосли осон набуд. Тибқи баъзе маълумотҳо то даври 8-ум ба ғалаба бештар “Бачаи тиллоӣ” наздик будааст, вале баъдан онро Мосли ба даст гирифтааст. Ҳарчанд мухлисон дар даври 12-ум рақобати олии Оскарро мушоҳида намуданд, аммо бартарии бештарро дар 3-пайти охир Шейн соҳиб шуда, рӯи шоҳсуфаи зафар баромад.

Дар соли 2003, Оскар бо умеди интиқом рақиби сарсахту шикастнопазири хеш Шейн Мослиро дигарбора ба майдон хонд, аммо ин бор ҳам мувоҷеҳи шикаст шуд. Нокомӣ натанҳо варзишгарро ба хашм овард, балки ӯро барои гузаштан ба вазни якуми олӣ ва рақобат бо муштзанони қавитар таҳрик медод. Мағлуб намудани Феликс Штурми олмонӣ дар он мавсим далели ин гуфтаҳост.

Пас аз шикаст хӯрдан аз Бернард Ҳопкинс дар соли 2004, Оскар ба вазни миёна гузашт ва дар соли 2006 Рикардо Майоргаро нокаут кард.

РАҚОБАТ БО МАЙВЕЗЕР ВА НОАДОЛАТИИ ДОВАРОН

Аввалҳои моҳи майи соли 2007 Де Ла Ҳойя бори аввал бо Флойд Мейвезер барои унвони WBC ба мубориза баромад. Дар ин рақобати тезутунд, ки 12 раунд давом кард, хеҷ кадоме ба якдигар таслим шудан нахостанд.

Вазъияти баҳсбарангез бо овоздиҳии доварон ҳал шуд, ки аксари холҳоро ба Мейвезер доданд. Оскар аз ин тасмим норозӣ буд ва эътирози ӯро дар мавриди ноодилона баҳодиҳии доварон, ҳатто Костя Тсзюи рус, пас аз тамошои наворҳо тасдиқ намуд.

МУБОРИЗА БО МЭННИ ПАКЯО

Соли 2008 мубориза байни Де Ла Ҳойя ва муштзани филиппинӣ Мэнни Пакяо сурат гирифт. Бар хилофи интизориҳои мухлисони “Бачаи тиллоӣ” дар даври 8-ум рақиби ӯ бо нокаути техникӣ пирӯз гардид. Пас аз мағлубият Оскар эълон кард, ки аз варзиши касбӣ канор меравад ва таваҷҷуҳи хешро бештар ба тиҷорат ва таблиғоти бокс байни наврасон равона хоҳад кард.

ҲАЁТИ ШАХСӢ

Ба ҳаёти шахсии Оскар агар назар кунем, ҳолатҳое мушоҳида мегардад, ки аслан хоси нафарони шуҳратманду шинохта нест. Барои мисол ӯ пас аз канор рафтан аз олами бокс иродаи хешро аз даст дода, ба истеъмоли пайвастаи машрубот ва маводи мухаддир машғул гардид, ки ин амал ӯро аз се ҳамсар ҷудо намуда, 6 фарзандашро зиндаятим кард. Дар ин баробар борҳо паси чанбари автомобил дар ҳолати сархушии аз ҳад зиёд менишаст, ки ин метавонист ӯро бармаҳал аз ҳаёт маҳрум созад. Аммо дубора иродаи қавӣ ба ӯ пирӯз омад ва ӯ соли 2014 ба хеш қарор дод, ки бояд аз муътодӣ раҳо гардад. Ҳамин тавр, баъди пайваста табобат гирифтан, одати бади нашъамандӣ ӯро раҳо кард.

Ҳоло бошад, собиқ чемпиони ҷаҳон оид ба бокс ба тарғиби оммавигардонии варзиш, махсусан бокс машғул буда, инчунин молики “Golden Boy Promotions” мебошад. Ҳамзамон ӯ мунтазам нияти худро барои баргаштан ба ринг изҳор намуда, бар он назар аст, ки агар ҷаноби Пул, яъне Флойд Мейвезер рақобати дигарбора бо ӯро пазирад, ҳамон замон вориди ринг хоҳад шуд.

Яҳё МАҲМАДНАБИЕВ, “ҶТ”