Дар шаҳри Душанбе бахшида ба иди Наврӯзи байналмилалӣ Дави наврӯзӣ ва Марафони велосипедронӣ баргузор шуд.

Дар оғозӣ чорабинӣ Аҳтам Абдулозода, раиси Кумитаи кор бо ҷавонон ва варзиш ва Мавсума Муинӣ, муовини раиси шаҳри Душанбе ҳама иштирокдоштагонро бо иди байналмилалии Наврӯз табрику таҳният намуда, барои дӯстдорони варзиш муваффақиятҳо таманно карданд.

Марафони велосипедронӣ аз соати 8:00 то 9:00 ва Дави наврӯзӣ аз соати 9:00 то 10:00 аз назди маҳаллаи Чорбоғ то Наврӯзгоҳ ҷараён гирифт шуд. Дар мусобиқаи велосипедронӣ беш аз 1300 нафар ва дар давидан беш аз 5000 нафар ширкат карданд. Иштирокчиёни фаъол бо сипосномаҳои Кумитаи кор бо ҷавонон ва варзиш ва Кумитаи миллии олимпии Тоҷикистон сарфароз гардиданд.

Меҳрубон Шамсиддинов, донишҷӯи Донишгоҳи давлатии тиббии Тоҷикистон ба номи Абӯалӣ ибни Сино ғолиби Дави наврӯзӣ иброз дошт, ки солҳои зиёд аст, ки ба варзиш машғул буда, соли дуюм аст, ки дар ин мусобиқа мақоми аввалросоҳиб мешавад.

- Варзиш барои ҷавонон бисёр муҳим аст. Вақте ҷавонони ҳар як давлат ба варзиш машғул мешаванд, албатта муллату давлати он кишвар солим мебошад. Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон барои оммавӣ гардонидани варзиш ҳамеша кӯшиш доранд”, - гуфт М. Шамсиддинов.

Мақсад аз баргузории чунин чорабиниҳои варзишӣ ҷиҳати таҷлили иди байналмилалии Наврӯз, таъмини оммавияти тарбияи ҷисмонӣ ва варзиш, ташвиқу тарғиби ҳаёти солим мебошад.