Аз 8 то 10 ноябр дар Кумитаи миллии олимпии Тоҷикистон семинари омӯзишии нозирони допинг баргузор шуд. Дар ин бора Кумитаи миллии олимпии Тоҷикистон иттилоъ дод.

Тибқи иттилои манбаъ семинар бо ташаббуси Агентии ҷаҳонии зидди допинг (WADA), Ташкилоти минтақавии зидди допинг дар Осиёи Марказӣ (RADOCA) ва Ҳамбастагии олимпӣ баргузор шуда, 10 мутахассиси соҳаи тибби варзиш аз ҳамаи минтақаҳои ҷумҳурӣ ба омӯзиш ҷалб шуданд.

Машғулиятҳоро ба таври назариявӣ ва амалӣ роҳбари RADOCA Венера Абдулла гузаронида, дар анҷом ба иштирокчиёни сертификат тақдим карда шуд. Онҳо минбаъд дар Тоҷикистон ҳамчун нозири допинг фаъолияташонро идома медиҳанд.

Таъкид шуд, ки Кумитаи миллии олимпии Тоҷикистон тибқи Кодекси ҷаҳонии зидди допинг аз январи соли 2021 ҳамзамон уҳдадориҳои Ташкилоти миллии зидди допингро иҷро мекунад.

Ёдовар мешавем, ки Венера Абдулла ҳамчунин бо Собирзода Парвиз, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон мулоқот кард. Яке аз он мавзуъҳое, ки дар мулоқоти мазкур сари он сухан рафт, масъалаи таъсиси як ташкилоти зидди допингӣ дар Тоҷикистон буд.