Бо ибтикори Кумитаи кор бо ҷавонон ва варзиш дар ҳамкорӣ бо Федератсияи футболи Тоҷикистон ва Кумитаи миллии олимпӣ, санаи 10 август бахшида ба таҷлили Рӯзи варзишгарон силсила чорабиниҳои оммавӣ-варзишӣ ва солимгардонӣ ва суҳбату мулоқотҳо бо варзишгарон ва собиқадорони варзиш доир гардид.

Аз ҷумла аз соати 6:30 дар боғи Парчами давлатӣ, боғи Рудакӣ, Нишони давлатӣ, Сирки давлатӣ, саҳни бинои Опера ва балет ва Варзишгоҳи марказӣ беш аз 1000 нафар наврасону ҷавонон машқи пагоҳирӯзӣ намуданд.

Соати 9 дар толори Муассисаи давлатии “Мактаби ҷумҳуриявии маҳорати олии варзиши оид ба намудҳои гӯштин”  ифтитоҳи расмии Рӯзи варзишгарон бо ишитироки варзишгарону мураббиён ва собиқадорони соҳаи варзиш  баргузор гардид, ки дар он раиси Кумита Аҳтам Абдуллозода  иштирок намуда, варзишгарон ва собиқадоронро ба муносибати иди касбияшон самимона шодбош гуфта, афзуд: “Боиси ифтихор ва сарфарозист, ки дар натиҷаи дастгириҳои пайвастаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон имрӯз варзиши тоҷик дар дохил ва берун аз кишвари азизамон мақому мартаби хоссаеро касб кардааст ва бо шукргузорӣ аз сулҳу ваҳдати миллӣ ва Истиқлолияти комили миллати тоҷик мо имрӯз Рӯзи варзишгаронро дар тамоми гӯшаи Тоҷикистон бо як шукӯҳу шаҳомати хосса таҷлил намуда истодаем. Мо – масъулини соҳаи варзиш, мураббиёну варзишгарони кишвар ҳамеша талош бар он менамоем, ки варзиши
 мамлакат ҳарчӣ зиёдтар рӯ ба тарақи ниҳад ва варзишгарони мо соҳиби муваффақиятҳои бештар гарданд”.

Дар давоми ҳамин чорабиниҳо ниммаи рӯз дар ноҳияи Варзоб чорабинии идона бо иштироки масъулини Кумитаи кор бо
ҷавонон ва варзиш, варзишгарон ва собиқадорони соҳаи варзиш баргузор карда шуд. 

Дар рафти чорабинӣ ба 30 нафар собиқадоронӣ соҳаи варзиш, 30 нафар варзишгарони муваффақ ва 16 нафар собиқадорони соҳаи футбол тӯҳфаҳои молию пулӣ ва дастархони идонае, ки бо дастгрии Президенти Федератсияи футболи Тоҷикистон муҳтарам Рустами Эмомалӣ омода гардида буданд тақдим карда шуд.

Хуршед ХОВАРӢ, "ҶТ"