ё иқдоме, ки баҳри тақвияти риштаи футбол роҳандозӣ шудааст

Футболи тоҷик тӯли даҳсолаҳост, ки ба дастовардҳои назаррас ноил гардида истодааст. Ин аз беҳтар гардидани вазъ дар Федератсияи футболи Тоҷикистон дарак медиҳад. Федератсияи мазкур ҳамасола тадбирҳои нав ва мақсаднокеро баҳри боз ҳам пешрафта гардонидани ин самт ва ҷалби бештари ҷавонон ба варзиши рақами яки сайёра рӯйи даст мегирад.

Ин навбат низ иқдоми дигаре аз ҷониби роҳбарияти ФФТ роҳандозӣ гардид, ки сутуданист. Имсол бори аввал дар таърихи футболи тоҷик таҳти сарпарастии президенти Федератсияи футболи Тоҷикистон муҳтарам Рустами Эмомалӣ озмуни “Беҳтарин мухлиси сол - 2024” баргузор мегардад.

Нуктаҳои вобаста ба баргузории озмун, критерияҳои баҳогузорӣ ва шартҳои асосии онро Сайвалӣ Шоқурбонов, директори генералии Лигаи футболи Тоҷикистон ба роҳбарони дастаҳои лигаҳои олӣ ва якум ва роҳбарони гурӯҳҳои мухлисони дастаҳо чанд рӯз қабл ироа намуд. Вобаста ба тартиби баргузории озмун ва шартҳои иштирок дар он суҳбате доштем бо Сайвалӣ Шоқурбонов, ки фишурдаи онро пешкаши хонандагон мегардонем.

- Нақшаи баргузор намудани “Беҳтарин мухлиси сол - 2024” кай тасдиқ гардид?

- Дар робита ба иҷрои саривақтии дастуру супоришҳои протоколи мулоқоти Раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе, президенти Федератсияи футболи Тоҷикистон муҳтарам Рустами Эмомалӣ, ки 3 ноябри соли 2023 бо масъулони соҳаи варзиши ВМКБ, вилоятҳои Суғду Хатлон ва роҳбарияти як қатор вазорату идораҳои мамлакат, инчунин аҳли ҷомеаи футболи ҷумҳурӣ баргузор гардид, Лигаи футболи Тоҷикистон нақшаи чорабиниҳои лигаро барои соли 2024 таҳия намуд. Тибқи нақшаи мазкур яке аз чорабиниҳои муҳим ин доир намудани озмуни “Беҳтарин мухлиси сол - 2024” мебошад. Озмуни мазкур бори аввал дар футболи тоҷик таҳти сарпарастии бевоситаи президенти Федератсияи футболи Тоҷикистон муҳтарам Рустами Эмомалӣ сурат мегирад.

- Тартиби баргузории озмун чӣ гуна аст?

- Озмуни мазкур аз моҳи январи соли 2024 оғоз ёфта, то охири мавсими ин сол давом хоҳад кард. Фонди ҷоизавии озмун 100 000 (сад ҳазор) сомониро ташкил медиҳад.

Вобаста ба мафҳуми “Беҳтарин мухлиси сол – 2024” мехоҳам қайд намоям, ки мухлисон ё фан-клубҳо (клубҳои мухлисон) метавонанд, дастоварду навовариҳои муосири мухлисии олами футболро дар бозиҳои хонагии дастаҳои футболи дӯстдоштаи худ истифода намоянд. Аз ҷумла, ҳаводорон метавонанд василаҳои мухлисии гуногунро, ба монанди замзамаҳои мусиқиомезу форами иборат аз дубайтиҳо ва назмҳои таҳрикдиҳанда, нишон додани рафтор ва одоби намунавии мухлисӣ дар варзишгоҳҳо, харидории чиптаҳои даромад ҷиҳати мусоидат ба рушди молиявии клуб, истифодаи парчам бо нишонаҳои клуб, инчунин одобу рафтори намунавӣ дар шабакаҳои иҷтимоӣ ва саҳифаҳои расмии дастаҳо ҳангоми андешаронӣ ва дигар василаҳое, ки тибқи қонунгузории амалкунандаи Ҷумҳурии Тоҷикистон иҷозат дода шудааст, иштирок намоянд. Дар баробари ин, ҳамчунин фан-клубҳо ё гурӯҳҳои мухлисон дар рафти мавсими футбол ва бозиҳо метавонанд, аз маводҳои таблиғотӣ, атрибутикҳо, баннерҳо, овезаҳо, парчамҳо ва дигар василаҳои мухлисие, ки ба фарҳанги миллии тоҷикон, забони давлатӣ ва дигар муқаддасоти миллӣ зиддият надоранд, бе маҳдудият истифода намоянд.

- Мақсади баргузории озмуни мазкур чист?

- Ҳадаф аз роҳандозӣ намудани озмуни “Беҳтарин мухлиси сол - 2024” ин ҷалби шумораи бештари мухлисон ба варзишгоҳ, баланд бардоштани фарҳанг ва маърифати мухлисӣ, таҳким бахшидани фаъолияти дастаҳои футбол дар самти кор бо мухлисон ва таъсиси фан-клубҳои ҳар як бошгоҳи футбол ва рушди фаъ-олияти онҳо мебошад.

- Озмун чанд номинатсияро дар бар мегираду чӣ гуна баргузор мешаванд?

- Озмуни мазкур аз рӯи ду номинатсияи асосӣ ташкил ва баргузор хоҳад гашт:

1. Номинатсияи инфиродӣ.
2. Номинатсияи гурӯҳӣ.

Шахсони дорои маҳ-дудиятҳои ҷисмонӣ, ки ба футбол шавқу ҳавас доранд ва онро мухлисӣ менамоянду ба варзишгоҳи дастаи худ дар бозиҳои хонагӣ мунтазам ҳузур меоранд, ба номинатсияҳои инфиродии озмун ворид карда мешаванд.

- Барои иштирок дар озмун аз гурӯҳи мухлисон кадом корҳо тақозо карда мешавад?

- Гурӯҳи мухлисони дилхоҳ дастаи футболро мебояд ҳатман барои худ номи муносиб ба фарҳанги миллӣ ва таърихи даста интихоб намоянд. Дар баробари ин, ҳамчунин, роҳбари гурӯҳ ё фан-клуб ба Лигаи футболи Тоҷикистон нақшаи чорабиниҳои худро барои иштироки мавсими дарпешистода таҳия ва пешниҳод намояд.

- Барои баҳогузорӣ киҳо ҷалб мешаванд ва озмун чӣ гуна натиҷагирӣ хоҳад шуд?

- Ҷиҳати назорат аз раванди озмуни “Беҳтарин мухлиси сол - 2024”, натиҷагирӣ ва баҳогузории он комиссияи назоратию санҷишӣ иборат аз мутахассисони Федератсияи футболи Тоҷикистон, Лигаи футболи Тоҷикистон, мақомоти ҳифзи ҳуқуқ, собиқадорони футбол, журналистони соҳавӣ ва мутахассисон аз дигар мақомоту идораҳои дахлдор ҷалб мегарданд.

Комиссия оид ба муайян намудани “Беҳтарин мухлиси сол – 2024” корро дар асоси гузориши комиссарон, наворҳои видеоии бозиҳо, гузориш ва баҳодиҳии намояндагони ҳифзи ҳуқуқ дар бозиҳо (аз рӯйи формаи махсус), протоколи бозиҳо ва таҳлили солонаи андешарониҳои мухлисони дас-та дар саҳифаҳои иҷтимоӣ ба роҳ монда, бо натиҷагирӣ аз он ғолибонро муайян хоҳанд кард.

- Озмуни мазкур аз рӯи кадом шартҳо баҳогузорӣ хоҳад шуд?

- Тибқи Низомнома Комиссияи озмун бо маълумотҳои ҷамъбастӣ шинос шуда, ба онҳо аз рӯйи меъёрҳои зерин баҳогузорӣ менамояд:
- одобу ахлоқи мухлисони даста дар варзишгоҳ ҳангоми бозӣ ва баъд аз анҷоми он;
- адади ниҳоӣ ва ҷамъбастии иштироки мухлисони даста дар бозиҳои хонагӣ ва сафарӣ дар давоми мавсим;
- иштирок дар корҳои ободонию кабудизоркунии атрофи варзишгоҳи даста;
- шумораи зиёди хариди чиптаҳо дар бозиҳои хонагӣ (аз рўйи протоколи махсус санҷида мешавад);
- фаъолии дастгириҳои мухлисони даста дар давоми бозӣ (бо дақиқа);
- фаъолнокӣ бо пахши наворҳои рекламавӣ дар шабакаҳои иҷтимоӣ;
- ташкил намудани “фанзонаҳо” дар атрофи варзишгоҳҳо қабл аз бозиҳо;
- камтарин шумораи қарорҳои содирнамудаи Кумитаи тартибу интизоми Федератсияи футболи Тоҷикистон вобаста ба амалу кирдорҳои мухлисони даста дар давоми сол;
- маълумотнокии мухлисон дар бораи таърих, бозингарон ва тактикаҳои даста;
- омода намудани лавҳаҳо, парчамҳо ё ташкили “чорабиниҳои мухлисон”, инчунин, иштироки фаъол дар шабакаҳои иҷтимоӣ, форумҳои мухлисон ва клубҳои мухлисон низ метавонад, ба назар гирифта шаванд.

- Дар озмун шаҳрвондони хориҷие, ки футболи тоҷикро мухлисӣ мекунанд ҳаққи иштирок доранд?

- Бояд қайд намоям, ки дар озмуни мазкур шаҳрвандони хориҷӣ дар он сурат ҳаққи иштирокро ба даст меоранд, ки дар ҳудуди Ҷумҳурии Тоҷикистон будубоши доимӣ доранд.

- Ин озмун ҳамаи лигаҳои футболи Тоҷикистонро дар бар мегирад ё танҳо тааллуқ дорад ба Лигаи олӣ?

- Озмуни мазкур он мусобиқаҳоеро дар бар мегирад, ки зери Лигаи футболи Тоҷикистон баргузор карда мешавад. Ба ин гурӯҳи мусобиқаҳо, мусобиқа барои дарёфти Ҷоми Федератсияи футболи Тоҷикистон, мусобиқаи ҷумҳуриявӣ барои дарёфти Ҷоми Тоҷикистон, Суперҷом, бозиҳои Чемпионати Тоҷикистон байни дастаҳои Лигаи олӣ ва Лигаи якум дохил мешаванд.

- Барои иштирок дар озмун ягон маҳдудият ба назар гирифта шудааст ё не?

- Дар озмуни мазкур ягон намуд маҳдудият ба назар гирифта нашудааст. Тамоми шаҳрвандони Ҷумҳурии Тоҷикистон метавонанд дар озмун иштирок намоянд. Албатта, аз тариқи дастаҳои футболии шаҳру ноҳияҳои худ. Барои возеҳтар шудан бояд қайд намоям, ки ҳар як дастаи футболи лигаҳои олӣ ва якуми кишвар фан-клубҳои худро таъсис додаанд ва раванди бақайдгирии мухлисони худро аллакай шуруъ намудаанд.

- Озмуни мазкур солҳои оянда низ баргузор мешавад ва ё танҳо барои ҳамин сол аст?

- Бале. Минбаъд ҳамасола баргузор мегардад.

Ҳошим РАҲМАТУЛЛОЕВ, “ҶТ”