Аз 2 март дар Қасри теннис ва маҷмааи варзиши обии шаҳри Душанбе Чемпионати Ҷумҳурии Тоҷикистон оид ба гӯштингирӣ дар соли 2023 оғоз гардид.
Мусобиқаи мазкур барои муайян намудани ҳайати тими миллии мунтахаб барои иштирок дар мусобиқаи байналмилалии гӯштини миллии “Гӯштингирӣ” равона гардида, дар рӯзи аввали он, ки 2-юми март баргузор гашт, Абдулло Раҳмонзода, раиси Кумитаи кор бо ҷавонон ва варзиши назди Ҳукумати кишвар иштирок ва суханронӣ кард.

Сабқатҳо аз рӯи 7 вазн баргузор гардида, беҳтаринҳо ба мусобиқаи байналмилалии “Гӯштингирӣ” роҳхат хоҳанд гирифт. Дар рӯзи аввали рақобатҳо дар вазни -60 кг Муслимбек Каримов ба гирифтани нишони тилло сарафроз гардид. Сомон Аламов ҷои дуюм, Абдусаттор Абдураҳимов ва Исо Қодирзода ба гирифтани нишонҳои биринҷӣ даст ёфтанд.

Дар вазни -65 кг бошад, мақоми аввалро Муҳаммадхолид Ҷалилов соҳиб шуд. Идибек Сафаров мақоми дуввум, Хурсандқул Куганов ва Баҳром Суфиев ҷои сеюмро касб карданд.

Дар вазни -71кг Муллораҷаб Халифаев аз ҳамаи ҳарифони худ пешсаф гардида, тавонист, мақоми аввалро ба номи худ мӯҳр занад. Фирдавс Олимов мақоми дуввум ва мақоми сеюм бошад, насиби Муҳаммадраҳим Сарахонов ва Муҳиддин Асадуллоев гашт.

Баргузории давоми мусобиқа имрӯз дар назар аст.

Ҳошим РАҲМАТУЛЛОЕВ, “ҶТ”