ВАРЗИШ
Якшанбе 16 Июн 2019 04:29
5250
Бо мақсади дастгирии ҳамаҷонибаи ҷавонон ва варзишгарон 27-уми декабр дар Муассисаи давлатии “Душанбе – Плаза” маросими ҷоизисупории соҳаи кор бо ҷавонон ва варзиш баргузор гардид. Ин маросим зери сарпасрастии президенти Федератсияи футболи кишвар Рустами Эмомалӣ ҷараён гирифта, дар он ҷавонон ва варзишгарони беҳтарини сол қадрдонӣ гардиданд.

Дар чорабинӣ муовини сарвазири Ҷумҳурии Тоҷикистон Азим Иброҳим, Раиси Кумитаи кор бо ҷавонон ва варзиш Абдуллозода Аҳтам, ноиби президенти Кумитаи миллии олимпии Тоҷикистон Шамсулло Соҳибов иштирок намуда, ҷавонону варзишгаронро барои соҳиб гардидан ба мақомҳои шоиста аз номи Президент ва аъзои Ҳукумати Ҷумҳурии Тоҷикистон табрик намуданд.

Аҳтам Абдуллозода зимни сухани ифтитоҳӣ ҷавонони кишварро баҳри ноил гардиданашон ба дастовардҳо табрик гуфта, нақши Пешвои миллатро дар рушди тамоми соҳаҳои муҳими ҷавонон баланд арзёбӣ кард. Ӯ аз ҷумла гуфт:

Муҳтарам парчамбардорони миллат, ҷавонони бонангу номуси кишвар, дар ин лаҳзаҳои фараҳбахш ва бо дарназардошти натиҷагирӣ аз соли «Рушди сайёҳӣ ва ҳунарҳои мардумӣ» мехоҳам ҳар яки шуморо, ки бо заҳматҳои софдилона бо дастовардҳои назаррас шарафёр гардидаед, аз номи Ҳукумати Ҷумҳурии Торҷикистон самимона муборакбод намоям. Самти кор бо ҷавонон ва варзиш яке аз масъалаҳои афзалиятноки сиёсати иҷтимоии давлату ҳукумат ба ҳисоб рафта, он маҳз ба хотири рушду нумуи ин қишри муҳими ҷомеа ва таъмини иштироки фаъолонашон дар ҳаёти сиёсӣ, иқтисодӣ, иҷтимоиву фарҳангии кишвар, таъмини оммавияти варзиш, омодакунии варзишгарони касбии тоҷик барои иштирок дар мусобиқаҳои бонуфузи байналмилаӣ равона гардидааст. Маҳз дар заминаи сиёсати ҷавонпарварона ва варзишпарваронаи Пешвои муаззами миллат, Президенти Ҷумҳурии Тоҷикистон, муҳтарам Эмомалӣ Раҳмон сиёсати давлатии ҷавонон дар рушду инкишофи соҳаи варзиш таҳким ёфта, дастовардҳои насли хуштолеи даврони соҳибистиқлол дар ҳамаи соҳаҳои ҳаётан муҳими ҷомеа назаррас арзёбӣ гардидааст. Дар доираи чунин дастгириҳо ҷавонони бонанги кишвар, аз ҷумла Дилшод Назаров, Мавзуна Чориева, Расул Боқиев, Беҳрўзи Хоҷазода, Хушқадам Хусравов, Даниел Рустамов, Ёсусан Усмонзода, Манижа Тошболтаева, Меҳрона Ғайбуллоева ва садҳо фарзандони ватандўст кишвари моро дар арсаи байналмилалӣ муаррифӣ карданд.

Азим Иброҳим, зимни ироаи сухани табрикӣ изҳор дошт, ки “бо дастгирии Асосгузори сулҳу ваҳдати миллӣ – Пешвои миллат, Президенти ҷумҳурӣ, Президенти Кумитаи миллии олимпӣ, муҳтарам Эмомалӣ Раҳмон соҳаи варзиш сол то сол рушд мекунад ва имсол бо Амри Президенти кишвар аз 25 декабр 76 нафар ба гирифтани Ҷоизаи Президенти Ҷумҳурии Тоҷикистон барои ғолибон ва ҷоизадорони мусобиқаҳои байналмилалии варзишӣ сазовор мегарданд. Бо ин мақсад аз Фонди захиравии Президенти мамлакат 931250 сомонӣ ҷудо шуд. Дар доираи ҳамин ғамхориҳо соли равон 649 варзишгари тоҷик, аз ин 66 нафар бону, бо маблағи умумии 2794754 сомонӣ ба 146 мусобиқаҳои сатҳи байналмилалӣ сафарбар гардида, дар натиҷа ба хазинаи варзишии кишвар 467 медал, аз ҷумла 151 тилло ворид намуданд, ки нисбат ба ҳамин давраи соли гузашта 42 медал зиёд мебошад. Хурсандибахш аст, ки аз шумораи умумиии медалҳо 136 медали он аз рўи намудҳои олимпии варзиш ба даст омадааст”.

Зикр шуд, ки агар дар 70 соли Иттиҳоди Шӯравӣ варзишгарони Тоҷикистон дар мусобиқаҳои байналмилалӣ ҳамагӣ 133 медал ба даст оварда бошанд, бо шарофати соҳибистиқлолии Тоҷикистон ин рақам дар 27 сол ба 4602 расидааст. Баромади бомуваффақи дастаи футболи то 16-солаи кишвар дар чемпионати Осиё-2018, дастоварди варзишгарон дар Бозиҳои Осиё, чемпионатҳои ҷаҳону Осиё ва дигар мусобиқаҳои байналмилалӣ боиси ифтихори бузург мебошад. Барои машқу тамрини варзишгарон феълан дар ҷумҳурӣ ҳудуди 10000 иншооти варзишӣ фаъолият мекунад, танҳо давоми ду соли охир сохта ба истифода додани зиёда аз 200 иншооти гуногуни варзишӣ дар пойтахти азизамон бозгӯи олии мавриди таваҷҷуҳи давлати Ҳукумати кишвар қарор доштани ҷавонону варзишгарон аст.

Дар соҳаи варзиш 76 нафар беҳтарин варзишгарон бо Амри Президенти Ҷумҳурии Тоҷикистон соҳиби ҷоизаи Президенти Ҷумҳурии Тоҷикистон гардиданд, ки нисбат ба ҳамин давраи соли 2017 ин нишондод 3 маротиба зиёд буда, маблағи он, ки аз фонди захиравии Президенти Ҷумҳурии Тоҷикистон ҷудо мегардад, 931250 сомониро ташкил медиҳад.

Ҷоизаи Президент имсол, аз ҷумла насиби ҷоизадорони Бозиҳои Осиё – Дилшод Назаров, Шаҳриёр Даминов, Беҳрӯз Хоҷазода, Комроншоҳ Устопириён, Шакармамад Мирмамадов, ғолибон ва ҷоизадорони чемпионатҳои ҷаҳону Осиё – Моҳру Ҳалимова, Идимоҳ Холова, Муҳаммадалӣ Абдураҳмонов, Ҷаҳонгир Маҷидов, Хайёмиддин Ҷабборов, Давлаталӣ Назаралиев, Ғаниҷон Ғаниев, Эмомризо Қурбонов, Азмуддин Ваҳҳобов, Бахтовар Ҳасанов, Ҳабибҷон Зуҳуров, Фирӯз Мирзораҷабов, Асламҷон Азизов, Раҳмонҷон Маҳмадбеков, тими футболи наврасони кишвар, Хушқадам Хусравов, Акмалиддин Каримов, Сорбон Латипов ва дигарон гардид.

Дар маросим дар баробари ҷоизаи Президенти Тоҷикистон ба ғолибону ҷоизадорони мусобиқаҳои байналмилалии варзишӣ аз рӯи 13 номинатсия беҳтаринҳои соҳа эълон гардиданд:

Беҳтарин варзишгари сол (намудҳои олимпӣ)

ДИЛШОД НАЗАРОВ - (ҷои дуюм дар Бозиҳои Осиё, ҷои якум дар ҷоми қораҳои IAAF, ҷойи якум дар мусобиқаи байналмилалии варзиши сабук дар Бразил, ҷои сеюм дар мусобиқаи байналмилалӣ дар Лаҳистон)

Беҳтарин варзишгари сол (намудҳои ғайриолимпӣ)

ХУШҚАДАМ ХУСРАВОВ - (қаҳрамони ҷаҳон оид ба самбо дар Бухарести Руминия)

Беҳтарин варзишгари сол миёни ҷавонон

ШАҲРИЁР ДАМИНОВ - (ҷои дуюм дар Бозиҳои Осиё, ду медали тиллои чемпионати Осиё миёни ҷавонон, ду медали биринҷӣ дар чемпионати Осиё миёни ҷавонон дар ҳайати даставӣ оид ба қайиқронӣ)

Беҳтарин варзишгарбонуи сол

ИДИМОҲ ХОЛОВА - (ҷои дуюм дар чемпионати Осиё миёни ҷавонон)

Беҳтарин дастаи мунтахаби сол

ТИМИ ФУТБОЛИ НАВРАСОН (U-16) (ҷои дуюм дар чемпионати Осиё)

Беҳтарин мураббии сол

ЗАЙНИДДИН РАҲИМОВ - (зери роҳбарии ӯ тими футболи наврасони кишвар медалҳои нуқраи чемпионати Осиёро сазовор гардида, ба чемпионати ҷаҳон-2019 дар Перу роҳхат гирифт.)

Беҳтарин федератсияи варзишии сол (намудҳои олимпӣ)

ФЕДЕРАТСИЯИ ФУТБОЛИ ТОҶИКИСТОН

Беҳтарин федератсияи варзишии сол (намудҳои ғайриолимпӣ)

ФЕДЕРАТСИЯИ САМБОИ ТОҶИКИСТОН

Беҳтарин шаҳр/ноҳияи варзишӣ

ШАҲРИ ДУШАНБЕ

Беҳтарин расонаи хабарии варзишӣ

ТВ “ВАРЗИШ”

Беҳтарин шореҳи варзишии сол

АЛӢ ШАРИФ (ТВ “Варзиш”)

Беҳтарин иншооти варзишии сол

МАҶМААИ ВАРЗИШИИ НОҲИЯИ ДАНҒАРА

Беҳтарин муассисаи варзишии сол

МД “МАРКАЗИ ОМОДАГИИ ОЛИМПИИ ДАСТАҲОИ МУНТАХАБ”

Инчунин, 23 нафар мураббиён ва варзишгароне, ки меъёрҳои “Устоди варзиши Ҷумҳурии Тоҷикистон”, Устоди варзиши дараҷаи байналмилалии Тоҷикистон”, “Корманди шоистаи тарбияи ҷисмонӣ ва варзиши Тоҷикистон” ва “Мураббии шоистаи Ҷумҳурии Тоҷикистон”-ро иҷро намудаанд, бо шаҳодатномаҳо сарфароз гардиданд.

Ҳамзамон 55 нафар беҳтаринҳо дар доираи “Ҷоизаи Кумитаи кор бо ҷавонон ва варзиш” дар самти адабиёт, санъат, меъморӣ, рӯзноманигорӣ ва барномасозӣ сарфароз гардонида шуданд. Қобили зикр аст, ки ду нафар кормандони рӯзномаи “Ҷавонони Тоҷикистон” Хуршед Мавлонов, муҳаррири шуъба дар самти рӯзноманигорӣ ва Меҳроб Азимов, рассоми рӯзнома, дар самти санъат соҳиби ҷоизаҳо шуданд.




Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30

Июн 2019 c.