9-11 август дар урдугоҳи «Чангоб», воқеъ дар дараи Алмосии шаҳри Ҳисор, бахшида ба 25-солагии Истиқлолияти давлатии Тоҷикистон байни мактаб-интернатҳои низомашон махсус мусобиқаи варзишӣ оид ба шашка, шоҳмот, бадминтон ва футбол баргузор гардид.

Умеда Абдуллозода, муовини раиси шаҳри Ҳисор иштирокдоронро ба муносибати 25-солагии Истиқлолият таҳният гуфта, иброз дошт, ки ятимону бепарасторон, маъюбону барҷомондагон, ҳамеша  дар мадди назари Президент ва Ҳукумати мамлакат қарор дошта, ҳамчун узви комилҳуқуқи ҷомеа ҳеҷ гоҳ аз ғамхориву таваҷҷуҳ бебаҳра намемонанд.

Сипас, Ҷамшед Ҳамроев, сармутахассиси Раёсати тарбияи ҷисмонӣ ва инкишофи варзиши Кумитаи ҷавонон, варзиш ва сайёҳӣ аз дастгириҳои роҳбарияти кумита нисбат ба ин табақаи ниёзманди ҷомеа ёдовар гардида, қайд намуд, ки  ин иқдом низ яке дастгириҳои навбатӣ нисбат ба ин қишри ҷомеа мебошад.
    
Дар мусобиқаҳо зиёда аз 50 нафар тарбиятгирандагони мактаб–интернатҳои низомашон махсус аз шаҳру ноҳияҳои тобеи ҷумҳурӣ иштирок намуданд.

Дар натиҷа, дар ҳайати давставӣ тарбиятгирандагони мактаб-интернати ҷумҳуриявии бачагони нобино ва сустбини шаҳри Ҳисор сазовори ҷойи аввал гардиданд. Ҷойҳои дуюму сеюмро бошад, тарбиятгирандагони мактаб-интернатҳои шаҳри Душанбе ва ноҳияи Шаҳринав ишғол карданд.

Ба ғолибон медал, туҳфаҳои хотиравӣ ва “Диплом”-и Кумитаи ҷавонон, варзиш ва сайёҳӣ супорида шуд.