Бозиҳои тобистонаи осиёӣ, ки аз 18 август то 2 сентябр дар шаҳрҳои Ҷакарта ва Палембанги Ҷумҳурии Индонезия баргузор шуд, аз 45 давлати қораи Осиё 9704 варзишгарро ба ҳам овард.

Дар ин мусобиқа ҳайати тими мунтахаби кишварро 81 нафар варзишгар ташкил медоданд. Варзишгарони кишвар аз 42 намуди варзиш дар 16 намуд ширкат варзида, сазовори 7 медал (4 нуқра, 3 биринҷӣ) гардиданд. Бо чунин дастовард аз рӯи сифати медалҳо дар ҷои 30-юм, аз рӯи шумораи медалҳо мақоми 23-юмро касб намуданд.

Пас аз ҷамъбасти Бозиҳои XVIII тобистонаи осиёӣ соати 3-и шаби 3 сентябр як гурӯҳ варзишгарони тоҷик ба Ватан баргаштанд.

Дар миёни онҳо, аз ҷумла ҷоизадори бозиҳо, варзишгари маъруфи кишвар Комроншоҳ Устопириён вуҷуд дошт. Комроншоҳ дар мусобиқаи мазкур, дар ду намуди варзиш ҷудо ва самбо баромад намуда, сазовори ду медали биринҷӣ гардид. Комроншоҳ Устопириён дар вохури бо намояндагони ВАО-и кишвар иброз дошт, дар ин бозиҳо бо мақсади ба даст овардани медали тилло сафар намуда будам, аммо медалҳои биринҷӣ насибам шуд. Дар пеш чемпионати ҷаҳон оид ба дзюдо, ки 20-27 сентябр дар шаҳри Бокуи Озарбойҷон доир мегардад, интизор аст. Тамоми маҳорату малакаи варзишиамро дар ин мусобиқаи истифода намуда, барои зинаи қаҳрамонӣ талош менамоям.

Гурӯҳи охирини варзишгарони кишвар шаби 5 сентябр вориди ҷумҳурӣ гардиданд.

Дар миёни ин варзишгарон, барандагони медалҳои нуқраи бозиҳо, варзишгарони шинохтаи кишвар Шаҳриёр Даминов ва Умед Ҳасанбеков низ буданд. Шаҳриёр дар мусобиқаи қайиқронӣ дар байдаркаи якнафара дар масофаи 1000 метр, Умед дар мусобиқаи самбо, вазни 90 кг сазовори медали нуқра гардиданд.

Маврид ба зикр аст, ки медалҳои нуқраи Бозиҳои Осиё-2018-ро Дилшод Назаров (варзиши сабук, гурзандозӣ), Шаҳриёр Даминов (қайиқронӣ дар байдарка ва каноэ, С-1 1000 метр), Беҳрӯз Хоҷазода (кураш, 81 кг), Умед Ҳасанбеков (самбо, 90 кг) ва медалҳои биринҷиро Комроншоҳ Устопириён (дзюдо ва самбо, 90 кг) ва Шакармамад Мирмамадов (дзюдо, 100 кг) ба хазинаи варзишии Тоҷикистон ворид карданд.