Бо роҳхат гирифтани шиновари тоҷик Анастасия Тюрина дар III Бозиҳои олимпии наврасон-2018, шумораи ҳайати дастаи мунтахаби Тоҷикистон дар ин мусобиқа ба 3 нафар расид.

Федератсияи байналмилалии шиноварӣ номзадии варзишгари 16-солаи кишвар Анастасия Тюринаро дар Бозиҳои олимпии наврасон тасдиқ намуд.

Анастасия дар Бозиҳои олимпии наврасон дар намуди шиноварӣ дар масофаи 50 метр ба тарзи озод ва 50 метр ба парвона (butterfly) иштирок мекунад.

Маврид ба зикр аст, ки Анастасия сеюм варзишгари Тоҷикистон аст, ки ҷиҳати иштирок дар Бозиҳои тобистонаи олимпии наврасон-2018 роҳхат ба даст меорад. Пеш аз ин Бежан Файзуллоев дар намуди тирандозӣ (10 метр аз таппонча) ва Сулаймони Ҷамшед дар намуди дзюдо (то вазни 66 кг) ҳаққи иштирок дар мусобиқаи мазкурро пайдо карда буданд.

III Бозиҳои олимпии наврасон аз 6 то 18 октябри соли ҷорӣ бо иштироки 4000 варзишгари наврас аз 206 давлати ҷаҳон дар шаҳри Буэнос Айреси кишвари Аргентина доир мегардад.