ВАРЗИШ
Шанбе 25 Май 2024 10:22
9517
ё зиндагиномаи варзишгаре, ки аз мусобиқоти наврӯзӣ ба Гран-При роҳ ёфт

Ӯ барандаи ҷоизаҳо аз мусобиқаҳои гӯштини Осиёи Марказӣ, сазовори мақоми дуюм дар Чемпионати Тоҷикистон (ноҳияи Данғара), ғолиби мусобиқаи гӯштингирӣ дар рақобат бо писарон дар шаҳри Бухорои Ҷумҳурии Узбекистон, барандаи медали тилло дар мусобиқаи Ҷоми Имрон байни духтарон, дорандаи медали тилло миёни писарон аз Ҷоми Худойназар Боқиев, иштирокчии фаъол ба ҳайси гӯштингир дар мусобиқоти наврӯзӣ, ҷавонтарин варзишгар дар сабқатҳои Гран-Прии Душанбе мебошад.

Бо хондани ин сатрҳо шояд хонанда ӯро дар чеҳраи як варзишгари пуртаҷриба дарёбад. Аммо на, ин бону танҳо 15 сол дорад ва ӯ Мадина Қурбонзода аст.
Мадинаро ҳамагон дар намои духтаре мешиносанд, ки дар наврӯзии ноҳияҳои гуногуни кишвар бо писарон сабқат менамояд. Дар ин сабқатҳо кам андар кам писаре пайдо мешуд, ки ёрои бо ӯ даст ба гиребон шуданро мекард. Чун ӯ дар аксар мусобиқот дастболо шуда, соҳиби ҷоизаҳои арзишнок гардидааст. Ин бонуи мардирода зодаи деҳаи Кадучии ноҳияи Восеъ мебошад. Ӯ дар як муддати кӯтоҳ ном баровард ва мухлисони зиёдеро соҳиб гашт. Мадина аз хурдӣ бо тамошои рақобатҳои гӯштингирон дар телевизион худро ҳамчун варзишгар тасаввур мекард. Баҳри расидан ба ин ҳадафи худ ҳозир буд, аз дилхоҳ мушкилӣ убур намояд. Ҳатто розӣ набудани модар ба варзишгар шудани ӯ низ садди роҳаш нашуд. Ягона нафаре, ки Мадинаро дар ҷодаи интихобнамудааш дастгирӣ намуд, ин падараш Рустам Қурбонов аст, ки худи Мадина низ инро қайд кардааст.

“Вақте падарам шавқи зиёд доштани маро ба варзиш дид, тарафдориам намуд. Ҳатто бо исрори зиёди ман якчанд усули гӯштинро бароям омӯзонид”.
Дар он замон бародари Мадина ба тамрини гӯштини ҷудо машғул буд. Ӯ ҳамарӯза бо дучарха барои тамрин ба деҳаи ҳамсоя, ки 4-5 км масофа дошт, мерафт. Мадина низ бо иҷозат гирифтан аз падар ҳамроҳи бародар ба тамрин мерафт. Вақте модар аз ин огоҳӣ меёбад, бародари Мадинаро барои ин кор сарзаниш мекунад ва Мадинаро намегузорад, то барои тамрин равад. Бо вуҷуди ин, Мадина пинҳонӣ масофаи 4-5 км-ро пиёда тай намуда, ба толори варзишӣ мерафт, то аз машқ қафо намонад.

Падараш мегӯяд: “Модараш чанд бор ӯро сарзаниш кард, то дигар машқ накунад. Аммо вақте дар яке аз наврӯзиҳои деҳаамон гӯштин шуд, Мадина он ҷо иштирок карда, 10-11 нафар писарро мағлуб намуд ва аз дасти раиси ноҳия мукофотпулӣ гирифт. Пас аз мусобиқа назди модараш омада, пулҳояшро доду аз модар дуо гирифт. Модараш чун дид, ки ӯро аз роҳи интихобнамудааш гардонида наметавонад, гуфт дигар барои ту монеъ намешавам, машқ кардан гир”.
Ҳамин тавр, Мадина ҳамарӯза ба тамрин мерафт ва рӯз аз рӯз усулҳои навро омӯхта, дар роҳи интихобнамуда касбияташро бештар мекард. Сабқатҳо дар мусобиқоти наврӯзӣ ҷое буд, ки Мадина дар он бардоштҳои худро аз тамринҳо месанҷид.

Яке аз чунин мусобиқоти гӯштини миллӣ дар шаҳри Бохтар бахшида ба Наврӯзи байналмилалӣ баргузор гардид. Мадина дар ин мусобиқа ширкат намуд ва ҳамаи рақибонашро мағлуб карда, ҳаводорони гӯштини миллиро дар ҳайрат гузошт. Ҷолибии рақобати Мадина дар қувваозмоии ӯ бо писарон аст. Ӯ дар бисёр ҳолатҳо миёни бонувон ҳариф пайдо намекунад. Ин боис мегардад, то қаҳрамони мо дар аксарияти мусобиқот бо писарон даст ба гиребон шавад. Ин ҷолибият ҳамчунин дар сабқатҳои берун аз кишвар низ ба назар мерасад. Ба гуфтаи мо иштирок дар мусобиқаи гӯштингирии шаҳри Бухорои Узбекистон мисол шуда метавонад. Мадина ҳарчанд ба ин мусобиқа барои сабқат бо духтарон раҳсипор шуд, аммо аз сабаби пайдо накардани рақиб миёни бонувон бо писарон рақобат намуд. Ҳарчанд дар давлати бегона он ҳам бо писарон сабқат намуд, аммо тавонист нишони зарринро дар вазни хеш ба гардан овезад ва бо дастовез ба ватан баргардад.

Хислати дигаре, ки Мадинаро миёни ҳаводоронаш машҳур намудааст, ин розӣ нигаҳ доштани мухлисон ва боварӣ ба худ мебошад. Дар рақобатҳое, ки дар ҷашни наврӯзи ноҳияи Абдураҳмони Ҷомӣ баргузор гашт, иштирок кард ва яке аз шоҳҷоизаҳои рақобатро ба даст овард. Дар ин сабқат низ ҳарифони ӯ мисли ҳамеша писарон буданд. Худи Мадина дар ин бора мегӯяд:

“Ман боварӣ дорам ва онро бо худ ба татамӣ мебарам. Ҳангоми рақобат кӯшиш мекунам, то худро ҳамеша ором нигоҳ дорам ва боварии худро аз даст надиҳам. Зеро боварӣ яке аз шартҳои асосии пирӯзист”.

Устодаш Шарифҷон Қодиров яке аз муваффақиятҳои ӯро дар дуруст дарк кардани усулҳо ва маҳорати баланд доштанаш дониста, қайд мекунад:
“Фаҳмиши Мадина бисёр хуб аст. Ҳар як усулро зуд мефаҳмад ва бисёр хуб иҷро менамояд. Дар мусобиқаҳо вақте заифии рақибашро мегӯӣ, зуд ба ҳарифаш ҳамла оварда, ғолиб меояд”.

Мадина дар баробари ин ҳама дилкушод низ ҳаст. Ӯ шоҳҷоизаеро, ки дар мусобиқоти гӯштини ноҳияи Абдураҳмони Ҷомӣ ба даст оварда буд, ба ятимони ин ноҳия тақдим кард, ки ин кори ҳар кас нест.

Бузургтарин ва таърихитарин сабқат дар ҳаёти Мадина ин иштироки ӯ дар Гран-Прии Душанбе буд. Ӯ дар ин мусобиқат аз ҳама ҷавонтарин варзишгар ба ҳисоб мерафт. Ба ҷавонии хеш нигоҳ накарда, бо рақибони калонсол ва пуртаҷриба рақобат намуд. Дурахши ин бонуи варзишгар дар сабқатҳои Гран-При бисёр назаррас буд.

Ӯ дар даври аввал муқобили ҳарифи худ аз Ҳиндустон сабқат намуд. Мадина тавонист ҳарифи худро ба паҳлӯ афтонида, соҳиби як вазарӣ гардад, ки ин як имтиёз барои ҳамворсозии роҳи ӯ ба даври баъди тақдирсоз буд. Ҳамин тавр, Мадина бо бартарии як имтиёз ба даври дуюми сабқатҳо роҳ ёфт. Дар ин марҳила муқобили ӯ қаҳрамони феълии Африқо Морандои 30-сола рақобат кард. Мадинаи хурдсол ба муқобили ҳарифи пуртаҷрибаи худ маҳорати баланд нишон дод. Аз як имконияти бисёр хуб истифода намуда, ҳарифро бо усули латдиҳии даст, маҷбур сохт, таслим шавад. Дар даври сеюм Мадина аз ҳарифи худ аз Муғулистон мувоҷҷеҳи шикаст шуд. Дурахши бемисли ӯ дар ин сабқатҳо боис гашт, то Мадина дар қатори ТОП-100 варзишгари беҳтарини Федератсияи байналмилалии ҷудо шомил шавад.

Мадина айни замон омодагиҳои худро барои иштирок дар Чемпионати ҷаҳон миёни наврасон, ки моҳи август дар Загреб (Хорватия) баргузор мешавад, бештар карда истодааст. Шиори ягонаи ӯ дар зиндагӣ “Занҳо ҳама корро карда метавонанд!” буда, баҳри исботи ин гуфта камари ҳиммат бастааст. Орзуи ягонаи Мадина ин ба Бозиҳои олимпӣ роҳ ёфтан ва қаҳрамони олимпӣ шудан аст.

Мо низ дар навбати худ вазифадорем, то ин навраси умедбахши кишварро дастгирӣ намоем, то ӯ тавонад дар сабқатҳои байналмилалӣ парчамбардори кишварамон гардад.

Ҳошим РАҲМАТУЛЛОЕВ, “ҶТ”

Эзоҳи худро нависед



Рамзҳо дар расм