Муҳаммад Аброридинов. Нафаре, ки чандин маротиба парчами кишвари моро берун аз ҷумҳурӣ парафшон кардааст. Ӯ зодаи шаҳри Ҳисор аст. Айни замон 22 сол дорад ва дар овони ҷавониаш гарчанде муддати кутоҳе дар майдони бокс аст, аммо мушарраф ба гирифтани 40 медал аз мусобиқаҳои дохиливу байналмилалӣ гардидааст. Номбурда дар якчанд мусобиқоти осиёӣ ва байналмилалӣ иштирок карда, ба гирифтани мақомҳои ифтихорӣ сазовор шудааст.

 Муҳаммад мегӯяд, ки аз замони тифлӣ ба варзиш шавқу ҳавас дошт ва дар 13-солагӣ ба таври доимӣ машғули тамрин гашт.

- Ман аз замони хурдӣ ба варзиш шавқу ҳавас доштам ва аз тариқи телевизион мусобиқаҳои варзиширо тамошо мекардам. Дар охир ба як қарор омадам, ки худ низ ба варзиш машғул шавам, то дар оянда тавонам, парчами кишварамонро боло карда бошам,- гуфт Муҳаммад.

Қаҳрамони мо аз замони хурдсолӣ бо волидайни худ ба Душанбе омадааст. Ӯ дар мактаби варзишии шаҳри Душанбе таҳсил кард ва пас аз хатми он ба Донишкадаи тарбияи ҷисмонии Тоҷикистон ба номи С. Раҳимов дохил шуд. Айни замон донишҷӯи курси чоруми ин донишкада аст. Ҳамчунин, дар мактаби махсуси варзиши захираҳои олимпӣ рақами 9 оид ба бокс тамрин менамояд.

Ӯ мегӯяд, ки ҳамарӯза пеш ва баъд аз машғулиятҳои дарсӣ ба тамрин машғул шуда, бадани худро дар ҳолати зарурӣ нигоҳ медорад. Айни замон ӯ ба мусобиқоти дар пеш истода омодагии ҷиддӣ дида истодааст. Муҳаммад бузаргтарин дастовардашро дар соли 2022 соҳиб шудааст. Ӯ тавонист, дар як мусобиқаи байналмилалӣ дар Қазоқистон соҳиби медали нуқра, дар Чемпионати Осиё оид ба бокс дар Тошканд ҷои дуюм, Чемпионати Осиё оид ба бокс миёни ҷавонон дар шаҳри Аммони Урдун нишони биринҷӣ ва ғайраҳоро сазовор гардад. Айни замон ӯ талош дорад, то дар мусобиқаҳои дар пеш истода, иштирок карда мавқеи аз ин ҳам намоёнтарро касб намояд.

“Инсон набояд ҳеҷ вақт аз чизе, ки ҳаст, қаноатманд бошад. На аз он ҷиҳат, ки шукри ин ҳама доштаҳоро накунад не, балки ҳамеша аз дастовардҳои кӯчаки худ қаноатманд нагардад ва кӯшиши аз он беҳтар ва бузургтар ба даст оварданро кунад,”- мегуяд Муҳаммад.

Қаҳрамони мо пас аз мақоми дуюмро касб кардан дар мусобиқаи байналмилалии бокс миёни ҷавонон дар Қазоқистон ба гирифтани унвони устоди варзиши дараҷаи байналмилалӣ шарафёб гашт.

Муҳаммад мегӯяд, ки ҳама вақт бо боварӣ ба худ муборизаро шуруъ мекунад. Ягон вақт аз ҳарифи худ тарс надошт ва ҳамеша худро аз ӯ қавӣ эҳсос мекард.
“Як мушкилие, ки боис мегардад, то дар сабқатҳо шикаст бихӯрем, ин боварӣ надоштан ба худ ва ҳарифро қавитар аз худ донистан аст. Инсон бояд дар ҳама ҳолат ба худ боварӣ дошта бошад. Зеро боварӣ нисфи ғалаба аст”-гуфт ӯ.

Ӯ нақши волидони хешро бобати ба варзиш машғул шуданаш муҳиму аввалиндараҷа медонад, чун бовариву эътимоди волидон буд, ки роҳи муродро сарбаландона тай намуда истодааст.

“Боварии падару модар дар ҳама маврид ба инсон як неруи қавӣ мебахшад. Вақте ба варзиш машғул шудам, падару модарам ин тасмими маро дастгирӣ карданд. Ин як эҳсоси бисёр наҷиб аст, вақте ту медонӣ, ки падару модар ҳамеша ва дар ҳама ҳолат туро дастгирӣ мекунанд ва дар бари ту ҳастанд",- мегӯяд ҳамсуҳбати мо.

Ҳошим РАҲМАТУЛЛОЕВ, “ҶТ”