Варзишгарони Тоҷикистон дар 5-умин Бозиҳои варзишии кишварҳои БРИКС – 2024 (BRICS Sports Games 2024), ки аз 12 то 23 июн дар шаҳри Қазони Ҷумҳурии Тотористони Федератсияи Россия баргузор гардид, дар маҷмуъ 20 медал (3 нуқра ва 17 биринҷӣ) ба даст оварданд.

Аз рӯи шумора ва сифати медалҳои мунтахаби Тоҷикистон дар ин мусобиқа мақоми 17-умро соҳиб шуд.

Аз рӯи ҳисоби умумии медалҳо ва ҳам бо назардошти сифати онҳо дастаи мунтахаби Русия бо ба даст овардани 502 медал (262 тилло, 141 нуқра ва 99 биринҷӣ) мақоми аввалро соҳиб шудааст.

Мунтахаби Беларус (247медал (55 тилло, 85 нуқра ва 107 биринҷӣ)) мақоми дуввум ва мунтахаби Чин бо ба даст овардани 62 медал (20 тилло, 24 нуқра ва 18 биринҷӣ) дар мақоми севум қарор гирифтанд.

Ба даҳгонаи аввал, инчунин Узбекистон (17-39-58), Бразилия (7-20-23), Эрон (4-12-20), Озарбойҷон (4-9-21), Ҳиндустон (3-6-20), Қирғизистон (2-11-38) ва Қазоқистон (2-10-17) дохил шуданд.

Ба иттилои сомонаи расмии Бозиҳои 5-уми варзишии кишварҳои БРИКС, дар мусобиқот беш аз 4700 варзишгар аз 90 кишвари олам иштирок карданд.

Ба ҳайати дастаи мунтахаби Тоҷикистон дар ин бозиҳо 110 вазишгар шомил буд, ки дар мусобиқот аз рӯи 14 намуди варзиш ширкат варзида, дар чаҳор ришта – гӯштини камарбандӣ (9 медал). кураш (7 медал), самбо (3 медал) ва ҷудо (1 медал) - гирифтанд.