Раҷаббой Аҳмадзода, раиси вилояти Суғд, ба ноҳияи Айнӣ сафари корӣ анҷом дода, ба бунёди комплекси варзишӣ ва боғи фарҳангӣ – фароғатӣ санги асос гузоштанд.

Комплекси варзишӣ ва боғи фарҳангӣ – фароғатӣ аз варзишгоҳ бо 10 ҳазор ҷойи нишаст, ҳавзи шиноварӣ барои кӯдакону наврасон, майдончаҳои гуногуни варзишӣ ва боғи истироҳатӣ иборат буда, он бо дастгирии мақомоти иҷроияи ҳокимияти давлатии вилоят бунёд мегардад.

Раиси вилояти Суғд Раҷаббой Аҳмадзода зимни суҳбат бо сокинони ноҳияи Айнӣ иброз дошт, ки дар доираи “1300 рӯзи меҳнати зарбдор” ва ба истиқболи 30-солагии Истиқлолияти давлатии Ҷумҳурии Тоҷикистон дар тамоми шаҳру ноҳияҳои вилоят корҳои ободониву созандагӣ ҷараён дорад. Дар доираи омодагиҳо ба ин санаи таърихӣ дар шаҳру навоҳӣ бунёди беш аз 3 ҳазор иншооти таъиноташон гуногун ба нақша гирифта шудааст ва бунёди комплекси варзишӣ ва боғи фарҳангӣ – фароғатӣ дар ноҳияи Айнӣ аз ҷумлаи чунин иншоотҳост.