Баскетбол навъи машҳури варзиши олимпӣ дар тамоми дунё мебошад. Он бозии гурӯҳиест, ки дар он мақсад бо даст ба дохили сабади дар баландии 305 см аз замин ҷойгирбуда, тӯбро партофтан аст. Аввалин маротиба бозии баскетболро дар ИМА Ҷеймс Нейсмит ҷорӣ кардааст. Аввалин бозии байналмилалӣ соли 1904 баргузор шуда буд ва соли 1936 баскетбол ба Бозиҳои тобистонаи олимпӣ дохил карда шуд.

Бо вуҷуди ин дар мо баскетбол дар сатҳе, ки дигар намудҳои варзиш, ба мисоли футболу гӯштин, бокс ва дигар риштаи варзиш аст, рушд накардааст. Пас, чӣ бояд кард, то баскетбол рушд кунад ва бозингарони мо дар мусобиқаҳои байналмилалӣ номбардори миллат бошанд?
София Павловна, мураббии варзидаи риштаи баскетбол мегӯяд, бо назардошти он ки имконияти молиявии кишвари мо нисбатан маҳдуд аст, вале новобаста ба ин баскетбол дар мо вуҷуд дорад. Ба гуфтаи ӯ баскетбол рушд карда истодааст, вале на дар сатҳи зарурӣ.

“Бузургтарин мушкил ин аст, ки ислоҳоти махсуси давлатӣ вуҷуд надорад, ки на танҳо баскетболро рушд диҳад, алалхусус барои рушди кулли варзиши бачагона дар Тоҷикистон сармоягузорӣ кунад. Мутаассифона, аксари намудҳои варзиш аз ҳисоби рушди мустақили федератсияҳо инкишоф меёбанд, аммо барои онҳо на ҳама вақт маблағгузорӣ карда мешавад”,-гуфт С. Павловна.

Мавсуф мегӯяд, дар мо мушкили кадрӣ низ ҳаст. Донишкадаи тарбияи ҷисмонии кишвар на ҳамеша мутахассисони баландихтисосро омода мекунад, чунки бештари мутахассисони мо аз кишвар мераванд.

Ҳамзамон ӯ аз пастсифатӣ ва гаронии майдонҳои баскетболбозӣ изҳори нигаронӣ намуда, қайд кард, ки майдонҳои варзишии зиёд ҳаст, вале онҳо мувофиқи стандартҳо сохта намешаванд.

- Ин ҷо гап атрофи майдони баскетбол меравад. Баландӣ ва ҳаҷми ҳалқа ба назар гирифта нашудаанд, болои ин майдонҳо пулакӣ мебошанд, ки дастрасӣ ба онҳо маҳдуд аст, - илова намуд мавсуф.

Ба андешаи ӯ, бояд ягон қароре вуҷуд дошта бошад, ки мактабҳои варзишӣ ба ин майдонҳо дастрасӣ дошта бошанд. Барои мураббиёни бачагона ва клубҳои ҳаводорон нисбати одамоне, ки ба ин навъи варзиш ҷиддӣ машғул намешаванд, маблағро камтар кунанд.
“Барои нафароне, ки машғули рушди варзиши бачагона ва ташкили тими миллӣ дар Тоҷикистон ҳастанд, ки баъдан ин тимҳо дар мусобиқаҳои байналмилалӣ ширкат хоҳанд кард, бояд шароитҳои дигар фароҳам оварда шавад”.

- Бе маош касе кор намекунад. Мураббие, ки бо тимҳо кор мекунад, бояд ки ба кораш мароқ дошта бошад. Мушкили калони дигар бо бачаҳост, ки ҳеҷ кас намехоҳад, ба ҳайси мураббӣ кор кунад, чунки маош хеле кам аст. Ин ташвишовар аст, чунки мураббигӣ кор нест, ин ҳолати равонии шахс аст. Ин корро бояд дӯст дошт. Баъдан муҳимтар аз ҳама истеъдод бояд дошта бошӣ”, - илова намуд ҳамсуҳбати мо.
Боиси зикр аст, ки имрӯз новобаста аз ин баскетбол дар ҷумҳурӣ дастаҳои муваффақ низ дорем, ки дар мусобиқаҳои сатҳи ҷумҳуриявӣ ва берун аз он шинохта мешаванд.

Инчунин ба андешаи мутахассисони соҳа набудани сармоягузорӣ ва мутахассисони ин ришта барои пешрафт кардани баскетбол садди роҳ мешавад.

Синавбар Музаффаров, муовини директори мактаби варзишии №5 мегӯяд, баскетбол дар мо хеле рушд кардааст.
“Баскетболи мардона дар Тоҷикистон дар сатҳи баланд қарор дорад, танҳо аз дастаи духтарона каме танқисӣ мекашем, чунки духтарон ба ин навъи варзиш дар кишвари мо таваҷҷуҳи камтар доранд. Маблағгузорӣ аз тарафи ҳукумати кишвар нағз аст, мураббиён маоши хуб мегиранд”.

Ин ҳамсуҳбати мо мегӯяд, дигар риштаҳои варзиш, ба мисоли футболу гӯштини миллӣ ба он хотир рушд кардаанд, ки федератсияҳои онҳо пурқувваттар буда, бештар фаъоланд. Аз сабабе ки Федератсияи баскетбол фаъолияти на он қадар хуб дорад, гурӯҳҳои баскетбол аслан дар мактаби мо тамрин мекунанд.

-Бо вуҷуди ин ҳама дастаи баскетболи мардонаи мо дар сатҳи баланд қарор дошта, дар мусобиқаҳои ҷумҳуриявӣ ҷойи аввалро мегирад. Дастаи мо соли 2019 дар мусобиқаи дӯстона бо тими миллии Самарқанд дар кишвари Ӯзбекистон иштирок намуда, ғолиб омад,-изҳор дошт С. Музаффаров.

Евгений Владимирович, устоди варзиш мегӯяд, баскетбол дар мо дар ҳоли рушд аст.
“Бояд Ҳукумати кишвар моро дастгирӣ кунад, бо либоси варзишӣ таъмин намуда, мусобиқаҳоро зиёдтар ташкил намоянд”.
Дар хулосаи ин ҳама гуфтаҳо ҳамсуҳбатонамон таъкид карданд, ки бештари мутахассисони соҳаи баскетбол ба хотири паст будани маош тарки кор мекунанд. Аз ин рӯ, барои пешрафта гаштани ин навъи варзиш бояд зиёд кӯшиш ба харҷ дода, корро хуб ба роҳ монем.

Садбарг СУЯРОВА,
”ҶТ”