Дастаи яккачини ҷавонони кишвар дар доираи бозиҳои гурӯҳии Чемпионати Осиё-2018 бозии дуюми худро бо дастаи Малайзия баргузор намуд, ки он бо ҳисоби мусовии 2-2 хотима ёфт.

Ин дидор 23-юми октябр дар варзишгоҳи “Патриот Сандрабагаи”-и шаҳри Бекаси Ҷумҳурии Индонезия баргузор шуд.

Бозӣ барои шогирдони Мубин Эргашев, бисёр пуршиддат ва душвор ҷараён гирифт.

Дар дақиқаи 11-ум футболбози малайзиягӣ Муҳаммад Ҳодӣ Фаядҳ тӯби нахустинро вориди дарвозаи Шоҳрух Қирғизбоев карда, дастаашро пешсаф намуд.

Пас аз 23 дақиқа, ҷавонони тоҷик бо зарбаи 11-метра ҳисобро баробар намуданд. Тӯбро капитани даста Эҳсони Панҷшанбе ба нишон расонд. Дар дақиқаи иловагии қисми аввали бозӣ (45+1) голи дуюми дастаи Тоҷикистонро Далер Ёдгоров ба номи худ сабт намуд.

Қисми дуюм барои дастаи ҷавонони Тоҷикистон нобарор хотима ёфт. Дар дақиқаи 55-уми бозӣ сардовар ҷониби дарвозаи дастаи кишварамон зарбаи ҷаримавӣ таъин кард. Пас аз партофти зарбаи ҷаримавии Набил Ҳаким Бухорӣ тӯб ба пойи ҳимоятгари мунтахаби Тоҷикистон Ваҳдат Ҳанонов бархӯрда, вориди дарвоза гардид. Ҳамин тавр бозӣ бо ҳисоби 2-2 ба поён расид.

Пас аз натиҷагирии бозиҳои даври дуюм дар гурӯҳи "D" дастаи миллии ҷавонони Арабистони Судӣ бо шаш хол дар ҷойи аввал мебошад. Тими ҷавонони Тоҷикистон бо чор имтиёз дар ҷойи дуюм ва тими Малайзия бо як хол дар мақоми сеюм қарор дорад. Дастаи Чин бидуни имтиёз дар ҷадвал мавқеи охиррро соҳиб шудааст.

Дастаи мунтахаби ҷавонони мо дар бозии сеюми гурӯҳи "D" рӯзи 26-уми октябр тими Арабистони Саудиро қабул мекунад. Барои футболбозони тоҷик ин рақобат ҳалталаб маҳсуб меёбад.

Ёдовар мешавем, ки чемпионати Осиё-2018, миёни ҷавонони то 19-сола, аз 18-уми октябр то 4-уми ноябр дар ҷумҳурии Индонезия баргузор мегирад. Чор дастаи беҳтарини мусобиқа ба Ҷоми ҷаҳон-2019, ки дар Лаҳистон доир мегардад, роҳхат мегиранд.