Дастаи яккачини олимпии футболи Тоҷикистон (U-23) дар мусобиқаи байналмилалии “Чор миллат”, ки аз 15 то 21-уми январ дар шаҳри Дохаи ҷумҳурии Қатар доир шуд, бо касби 6 имтиёз қаҳрамони мусобиқа дониста шуд.

Дар ин мусобиқа чор дастаҳои мунтахаби олимпии Қатар, Кувайт, Тоҷикистон ва Эрон ширкат намуданд.

Дар бозии даври сеюм дастпарварони Усмон Тошев сармураббии тими олимпии Тоҷикистон (U-23) аз ҷониби ҳамсолони худ дастаи Кувайт бо ҳисоби 0-1 шикаст хурд.

Ин дидор 21-уми январ дар варзишгоҳи “Гранд Ҳамад” доир гардид.

Дар натиҷа дастаи мунтахаби олимпии Тоҷикистон бо касби 6 холи бадастоварда, ғолиби мусобиқаи байналмилалии “Чор миллат” дар Доха гардид. Мақоми дуюм бо 6 имтиёз насиби Эрон ва ҷои сеюму чорумро бо касби сехолӣ Қатар ва Кувайт ишғол намуданд.

Ёдовар мешавем, ки мунтахаби олимпии Тоҷикистон (U-23) дар даври аввали мусобиқа бар тими Эрон бо ҳисоби 2:1 ва бар мунтахаби Қатар бо ҳисоби 1:0 ғолиб омада буд.

Ин мусобиқа барои мунтахаби олимпии Тоҷикистон (U-23) яке аз давраҳои омодагӣ ба марҳилаи интихобии чемпионати Осиё-2020 маҳсуб мешавад. Баргузории марҳилаи интихобии чемпионати Осиё-2020 бошад, аз 21-ум то 26-уми март дар шаҳри Тошканди Ҷумҳурии Ӯзбекистон дар назар аст. Дар он футболбозони тоҷик (дар гурӯҳи “F”) бо дастаҳои мунтахаби Ҳиндустон (22-юми март), Покистон (24-уми март) ва Ӯзбекистон (26-уми март) рақобат хоҳад кард.