Дастаи якачини олимпии кишвар (U-23) бозии нахустини худро дар мусобиқаи байналмилалии “Чор миллат” бо ғалаба оғоз кард.

Ин дидор, 15-уми январ, дар майдони футболи Академияи “Aspire” баргузор шуда, футболбозони тоҷик тими Эронро бо ҳисоби 2-1 шикаст доданд.

Голи аввалини дидорро дар дақиқаи 4-ум футболбози эронӣ Воҳид Номдорӣ ба номи худ сабт карда, сипас сардори дастаи Тоҷикистон Эҳсони Панҷшанбе, дар дақиқаи 39-ум дарвозаи рақибро рахна намуда, ҳисоби бозиро баробар сохт.

Қисми дуюми рақобат бо бартарии дастпарварони Усмон Тошев, сармураббии тими олимпии Тоҷикистон (U-23) хотима ёфта, дар ибтидои рақобат ҳамлагари дастаи “Истиқлол”-и шаҳри Душанбе Шериддин Бобоев тӯби ғалабаоварро вориди дарвозаи эрониҳо намуд.

Бозии дигари даври аввали мусобиқаи байналмилалии “Чор миллат” бо бартарии дастаи олимпии Қатар ба поён расид. Қатариҳо ҳамсолони худ дастаи Кувайтро бо ҳисоби 3:1 шикаст дод.

Бозиҳои даври дуюми мусобиқаи “Чор миллат” 18 январ доир мегарданд. Дар ин давр тими мунтахаби олимпии Тоҷикистон бо дастаи Қатар вориди майдон мешавад.

Ёдовар мешавем, ки мусобиқаи байналмилалии “Чор миллат” аз 15 то 21-уми январ дар шаҳри Доҳаи давлати Қатар баргузор гардида, он барои мунтахаби олимпии Тоҷикистон (U-23) яке аз давраҳои омодагӣ ба марҳилаи интихобии чемпионати Осиё-2020 маҳсуб мешавад. Ин мусобиқа аз 21-ум то 26-уми март дар шаҳри Тошканди Ҷумҳурии Ӯзбекистон гузаронида шуда, футболбозони тоҷик дар гурӯҳи “F” бо дастаҳои мунтахаби Ҳиндустон (22-юми март), Покистон (24-уми март) ва Ӯзбекистон (26-уми март) рақобат хоҳад кард.

Тақвими бозиҳои мусобиқаи “Чор миллат”

Даври 2-юм, 18-уми январ

19:30 – Эрон - Кувайт

21:30 – Қатар - Тоҷикистон

Даври 3-юм, 21-уми январ

19:30 – Тоҷикистон - Кувайт

21:30 – Қатар - Эрон

Оғози бозиҳо ба вақти Душанбе аст.