Ба ифтихори Рӯзи олимпӣ дар шаҳри Хуҷанд як қатор чорабиниҳо баргузор шуданд, ки зимни ифтитоҳи онҳо муовини Президенти Кумитаи миллии олимпии Тоҷикистон Абдуллозода Аҳтам иштирок кард.

Дар ҳавзи шиноварии шаҳри Хуҷанд, ки мусобиқаи байналмилалӣ оид ба шиноварӣ ҷараён дорад, ҳамзамон бо ибтикори Кумитаи миллии олимпии Тоҷикистон курси омӯзишии Ҳамбастагии олимпӣ барои мураббиёни ин намуди варзиш оғоз ёфт, ки то 28 июн идома меёбад.

Дар он 20 мураббии намуди шиноварӣ аз ҳамаи минтақаҳои ҷумҳурӣ иштирок доранд. Мураббиён аз коршиноси дараҷаи байналмилалӣ Анатолий Журавлеви русиягӣ нозукиҳо ва тартибу муқаррароти намудҳои шиновариро ба таври назариявӣ ва амалӣ меомӯзанд.