Субҳи 29 агвуст донишҷӯёну сокинон ва варзишгарони шаҳри Душанбе барои истиболи човандозони тоҷик, ки аз аввалин мусобиқаи ҷаҳонии бузкашӣ (кокпар) дар шаҳри Остонаи Ҷумҳурии Қазоқистон бармегаштанд, назди Фурӯдгоҳи байналмилалӣ ҷамъ омада, онҳоро бо гулу гулдаста пешвоз гирифтанд.

Ёдовар мешавем, ки аз 20 то 28 август дар шаҳри Остонаи Ҷумҳурии Қазоқистон аввалин мусобиқаи ҷаҳонии бузкашӣ (кокпар) доир гардид ва дар он чобуксаворони мунтахаби Тоҷикистон мақоми сеюмро ишғол намуданд.

Човандозони тоҷик барои соҳиб шудани мақоми сеюми мусобиқаи мазкур мунтахаби Чинро бо ҳисоби 2:1 мағлуб намуданд.

Барои шоҳҷоиза ва мукофоти пулӣ дар ҳаҷми 30 ҳазор доллари амрикоӣ дар даври ниҳоӣ мунтахабҳои Қазоқистону Қирғизистон бо ҳам рақобат намуданд ва мунтахаби Қазоқистон бо ҳисоби 4:1 ҳарифашро мағлуб намуд.

Човандозони тоҷик то қувваозмоӣ барои зинаи сеюм дар даврҳои қаблӣ тимҳои Туркия (12:2), Ӯзбекистон (3:1), ИМА (9:2) ва Муғулистонро (10:9) шикаст дода, танҳо дар як қувваозмоӣ аз тими Қирғизистон шикаст хурданд.

Маҳмадӣ Ҳакимов, президенти Федератсияи аспдавонӣ ва кок-боруи Тоҷикистон, ин нишондодро натиҷаи хуби варзишгарони тоҷик дар мавсими имсола арзёбӣ мекунад. “Нишондоди варзишгарони мо дар мусобиқаи мазкур беҳтарин аст. Зеро тими Қазоқистон, ки мақоми аввалро ишғол намуд, бо тамоми лавозимоти зарурӣ муҷаҳаз буданд. Мо бидуни аспҳо ба мусобиқа сафарбар шудем ва аз он ҷо асп кироя гирифтем. Аспҳо дар ҳолати варзишӣ набуданд, вале ба ин нигоҳ накарда човандозони тоҷик бо як ҳисси баланди миллӣ ва ғурури тоҷикона сабқат намуда, мақоми сеюмро ишғол намуданд. Як чизро қайд кардан зарур аст, ки мусобиқаи мазкур дар доираи қоидаҳои нав гузаронида шуд ва аз тартиби гузаронидани мусобиқаҳои мо фарқ мекард. Варзишгарон давоми 40 дақиқа чорнафарӣ ба майдон баромада ҳунарнамоӣ мекарданд. Як қисмати бозӣ аз 20 дақиқа иборат буд. Ҳарчанд дар мусобиқа 12 варзишгари тоҷик ҳунарнамоӣ карда бошад ҳам, нерӯю қувваи зиёда аз 8 миллион аҳолии Тоҷикистон онҳоро ҳамроҳӣ мекард”,- афзуд Маҳмадӣ Ҳакимов.

Тибқи иттилои президенти Федератсияи аспдавонӣ ва кок-бору дар мусобиқаи мазкур човандозони 12 кишвар миёни ҳам рақобат намуданд, ки аз миёни онҳо танҳо тимҳои Қирғизистон ва Қазоқистон бо аспҳои худ қувваозмоӣ намуданд. Дар ҳоли сафарбар намудани варзишгарон бо аспҳои худ човандозони тоҷик метавонистанд, натиҷаи аз ин ҳам хубтар ба даст оранд. Мусобиқаи мазкур барои варзишгарони тоҷик таҷриба дод ва онҳо нақша доранд, ки дар мусобиқаҳои баъдӣ бо аспҳои худ шарафи кишвари азизамонро дар зинаи якум муаррифӣ намоянд.

- Аспдавонӣ яке аз варзишҳои қадима буда, миёни мардуми тоҷик маҳбубияти хос дорад. Боиси хушнудист, ки дар баробари дигар намудҳои варзиш дар кишварамон навъи кок-бору рушд намуда истодааст ва ҳамасола дар доираи чорабиниҳо бахшида ба Наврӯзи байналмилалӣ аз ин намуди варзиш мусобиқаҳо гузаронида мешаванд. Баъди чунин натиҷаҳои назаррас аз мусобиқаҳои байналмилалӣ дар оянда мо тасмим гирифтаем, ки дар арафаи ҷашни Наврӯзи байналмилалӣ аз ин намуди варзиш мусобиқаҳои сатҳи байналмилалиро барпо намоем, - мегӯяд Абдулло Маҳмадализода, муовини сардори Раёсати тарбияи ҷисмонӣ ва рушди варзиши Кумитаи кор бо ҷавонон ва варзиши назди Ҳукумати Ҷумҳурии Тоҷикистон.

Шодихони НАЗАР, “ҶТ”