Шоми шанбеи 22-июн ду варзишгари тоҷик дар мусобиқаи UFC рақобат карданд. Пас аз рақобатҳо президенти UFC Дана Уайт изҳор намуд, ки ният дорад истеъдодҳои бештарро аз Тоҷикистон ба ташкилоти UFC ҷалб намояд.

Дар вазни сабук Муин Ғафуров бо намояндаи Кореяи Ҷанубӣ Кюнг Ҳо Кан вохӯрд. Мубориза, ки барои се раунд пешбинӣ шуда буд, тамоми пайт идома кард ва бо қарори якдилонаи доварон намояндаи Тоҷикистон ғолиб эълон гардид. Ин ғалабаи нахустини Ғавуров дар ташкилоти UFC маҳсуб меёбад.

Дар як қувваозмоии дигар Муҳаммад Наимов аз размикори бразилӣ Фелипе Лима шикаст хӯрд. Барои Наимов ин аввалин шикаст дар ташкилоти UFC буд. Ӯ қаблан се пирӯзӣ дар ин ташкилот дошт.

Дар нишасти хабарии баъд аз рақобатҳо рӯзноманигор Баҳриддин Ҷалолов аз Дана Уайт, президенти UFC пурсид, ки оё ташкилот ният дорад дар оянда ҳамкориро бо варзишгарони тоҷик бештар намояд? Дана Уайт ба савол ҷавоби мусбат дод:

“Албатта, мо имзои шартнома бо бачаҳо аз Тоҷикистонро идома хоҳем дод. То он даме, ки дар он ҷо истеъдодҳо ҳастанд, мо онҳоро барои худ мегирем.”

Яҳё МАҲМАДНАБИЕВ, “ҶТ”