Соли равон дар таърихи варзиш мебоист соли фаромӯшнашаванда ва пур аз навгонӣ мегардид. Ва онро варзишгарони ҷаҳон бо як умеду орзу интизор буданд. Эшон ният доштанд, дар Бозиҳои олимпии Токио-2020 дастовардҳои нав ба навро соҳиб шаванд ва дар таърихи варзиши олам саҳифаҳои нав ба навро кушоянд. Аммо ин тавр нашуд. Вабои аср, яъне коронавирус ба тамоми соҳаҳои ҳаёти ҷомеаи ҷаҳон таъсири бади худро расонд. Аз ҷумла, ба варзиш ҳам. Ҳамин тавр, баргузории Бозиҳои олимпии Токио-2020 ба таъхир афтод.

Зикр намудан бамаврид аст, ки аз кишвари мо ду нафар варзишгар, муштзанҳо Баҳодур Усмонов ва Шаббос Негматуллоев аллакай ба ин бозиҳо роҳхат ба даст овардаанд. Дигарон бошанд бо як тайёрии ҷиддӣ мебоист дар мусобиқоти ҳалшаванда ширкат варзида, роҳхатҳоро соҳиб мегардиданд.

Зубайдулло Маҳмадуллоев, сардори шуъбаи кор бо дастаҳои мунтахаби Кумитаи кор бо ҷавонон ва варзиш оиди ин мавзӯъ андешоти хешро чунин баён кард: “Вазъи ба амаломада то ҷое нигаронкунанда аст. Зеро дар ин мусобиқот синну сол низ нақши худро гузошта метавонад. Вале дар баробари ин барои боз ҳам хубтару ҷиддитар омода шудани варзишгарон, барои ба даст овардани роҳхатҳои олимпӣ як соли дигар илова шуд. Онҳоро лозим аст, муҳлати яксоларо пурсамар истифода намуда, маҳораташонро нишон диҳанд. То соҳиби роҳхат шаванд. Вале давоми як сол боз чи воқеаҳо шуданаш мумкин. Ба ин саволҳо дар ҳолате метавон ҷавоб пайдо намуд, ки вазъи кунунӣ муътадил гардад ва табобати ин беморӣ аз ҷониби мутахассисони соҳаи тиб ба таври бояду шояд ба роҳ монда шавад. То авҷ гирифтани он анҷом ёбад.”

Ҳамин тавр, бо авҷи беморӣ мусобиқаҳои байналмилалие, ки варзишгарон тавассути онҳо ба Бозиҳои олимпӣ роҳхат мегирифтанд, пайи ҳам аз нақшаи Кумитаи олимпии байналмилалӣ тоза шуданд. Яке аз чунин мусобиқот, ки онро варзишгари мо Шаҳриёр Даминов бо умеду орзуҳои зиёд интизорӣ мекашид, мусобиқаи байналмилалии Осиё доир ба қаиқронӣ буд, ки он ҳам бекор карда шуд. Оиди таъсир ва бекор шудани мусобиқаҳои байналмилалӣ Шаҳриёр чунин андеша баён кард: “Ба назарам бо бекор шудани мусобиқаҳои байналмилалӣ, ба варзишгароне, ки тайёрии ҷиддӣ дидаанд, таъсири ногувор гузошт. Зеро давраи тамринҳои варзишгар вайрон мешавад. Ин метавонад ба варзишгар таъсири манфӣ расонда, боварӣ ба худро аз даст диҳад. Ҳамчунин, варзишгароне, ки он қадар тайёрии хуб надиданд, бо илова шудани як соли дигар метавонанд ба мусобиқаҳои мазкур роҳ ёбанд. Ҳамин тавр, як имконият барои онҳо муҳайё гардид. Ба фикрам воқеаи мазкур ба 70 фоиз варзишгарони тоҷик таъсири мусбат расонд.”

Тавре дар боло ишора рафт, ду варзишгари тоҷик аллакай соҳиби роҳхат шудаанд. Оиди таъсири беморӣ ба варзиш Баҳодур Усмонов чунин изҳори андеша кард: “Дар аввал гуфтаниам, ки ҳамааш ба хости Худованд аст. Албатта, мо варзишгарон дар ин сол нақшаҳои зиёд доштем. Аммо беморӣ дар нақшаҳои ҳар яки мо халал ворид кард. Чунончи, тамрини дастаҷамъона, ки дар хориҷи кишвар бояд сурат мегирифт, мавқуф гузошта шуд. Лек як ҷиҳати мусбатро низ дидан мумкин. Ин ҳам бошад, вақти зиёд ба тайёрист, ки барои мо варзишгарон ҳамеша камӣ мекунад.”

Коронавирус, ки дар саросари ҷаҳон паҳн шудааст, чун меҳмони нохонда ба ҳар давлат сарашро халондаю мардуми онро гирифтори хеш мегардонад. Хушбахтона ин вабо вуруди кишвари мо нагаштааст. Варзишгарони мо ҳама тансиҳату пайваста аз пайи машқу тамринанд.
Ба ҳамаи варзишгарон - парчамбардорони кишвар комёбиҳо таманно намуда, боварӣ дорем ҳар чи бештар ба мусобиқоти бозиҳои олимпӣ роҳхат ба даст оварда, зинаҳои баланди муваффақиятро ноил мегарданд.