Ба ифтихори 30 соли Истиқлоли Ҷумҳурии Тоҷикистон бо дастгирии Дастгоҳи иҷроияи Президенти Ҷумҳурии Тоҷикистон дар шаҳри Хоруғи Вилояти Мухтори Кӯҳистони Бадахшон ду майдони нави варзишӣ мавриди баҳрабардорӣ қарор гирифтанд.

Тавре аз Бахши кор бо ҷавонон ва варзиши шаҳр иттилоъ доданд, майдонҳо дар маҳаллаҳои Дашти боло ва Табобатхонаи вилоятӣ ифтитоҳ ёфта, дар ин маросим раиси ВМКБ Ёдгор Файзов, раиси Федератсияи иттифоқҳои касабаи мустақили Тоҷикистон Маликшо Неъматзода ва шаҳрдори Хоруғ Мирзонабот Алишер Худоберди иштирок намуда, варзишгаронро бо туҳфаю лавозимот ва либосҳои варзишӣ қадрдонӣ карданд.

Гуфта шуд, ки майдони варзишии Дашти Боло дорои майдончаи бозии кӯдакона, майдони волейболу футбол, баскетбол буда, дар ояндаи наздик боз се майдони варзишии дигар дар маҳаллаҳои маркази вилоят ба истифода дода мешаванд.