13 июл дар шаҳри Магдебурги Олмон мусобиқаи варзишӣ оид ба аспдавонӣ барои дарёфти ҷоми Ҷумҳурии Тоҷикистон доир шуд.

Дар ин хусус сомонаи Вазорати корҳои хориҷӣ иттилоъ медиҳад.

Бино ба иттилои манбаъ дар он ҷаноби Гуннар Шелленбергер, раиси Парлумони музофоти федеролии Саксония-Анҳалт, сафирони як қатор кишварҳои хориҷӣ ва намояндагони васоити ахбори омма иштирок намуданд.

Гуфта мешавад, ки сафорати Ҷумҳурии Тоҷикистон дар Олмон дар ҳамкорӣ бо “German Global Trade Forum Berlin”, шабакаи тиҷоратии Дӯстони Шабакаи соҳибкорони “H4 Racing Club” ва ширкати “Wettstar” ҳамчун сарпарасатони як пойгаи мусобиқа дар масофаи 1300 метр баромад намуда, ба ғолибони пирӯзшуда мукофотҳои пулӣ ва туҳфаҳои хотиравӣ супориданд.

Лозим ба зикр аст, ки мусобиқаи мазкур таҳти шиори “Хуш омадед ба боми ҷаҳон. Тоҷикистонро бубинед, таҷриба кунед ва лаззат баред” баргузор гардид.

Ҳамчунин он ба ҳозирин имкон дод, ки дар бораи Тоҷикистон, бахусус иқтидор ва имконоти сайёҳии он бештар маълумот пайдо кунанд.

Гулафшон КАРИМОВА,“ҶТ”