Дастаи мунтахаби футзали Тоҷикистон дар доираи омодагӣ ба қисми ниҳоии Ҷоми Осиё-2024 бо тимҳои миллии Арабистони Саудӣ ва Ӯзбекистон бозиҳои дӯстона анҷом медиҳад.

Дар ин бора аз Федератсияи футболи Тоҷикистон иттилоъ доданд.

Бино ба иттилои манбаъ дастаи мунтахаби футзали Тоҷикистон бо тими миллии Арабистони Саудӣ рӯзҳои 26 - 28 феврал ва бо мунтахаби Ӯзбекистон 4 - 5 март вохӯрӣ анҷом медиҳад.

Дар назар аст, ки мунтахаби Тоҷикистон таҳти роҳбарии Пайрав Воҳидов аз 14 феврал то 2 март дар Ҷидда ҷамъомади таълимиву тамринӣ баргузор намояд ва дар ҳамин ҷо бо тими миллии Арабистони Саудӣ ду бозии дӯстона анҷом диҳад.

Мунтахаби Тоҷикистон пас аз анҷоми ҷамъомад дар Арабистони Саудӣ ҷиҳати анҷоми ду бозии санҷишӣ бо мунтахаби Ӯзбекистон ба Тошканд сафар хоҳад кард.

Дастаи футзали Тоҷикистон аввали моҳи феврал бо тими миллии Кувайт ду рақобати санҷишӣ (3:3, 2:4) доир карда буд.

Лозим ба ёдоварист, ки дар Ҷоми Осиё-2024, ки аз 17 то 28 апрел дар Тайланд баргузор мешавад, мунтахаби Тоҷикистон дар гурӯҳи “С” бо дастаҳои Кореяи Ҷанубӣ (18 апрел), Қирғизистон (20 апрел) ва Ҷопон (22 апрел) рақобат хоҳад кард.