“Кореягиҳо футболбозони пуртаҷрибаанд. Маҳорати хуби зарбазанӣ доранд. Аммо ман ҳар як зарбаи онҳоро дида чолокона ба он тараф ҳаракат менамудам. Дидам, ки ҳариф ба кунҷи дарвоза тӯбро равон кард, худро ба он тараф андохта, зарбаро бартараф намудам. Ин лаҳзаҳоро кайҳост, ки орзу доштам. Моро дар пеш рақобатҳои бузург интизор аст, танҳо барои ғалаба бояд ба майдон ворид шуд,”-мегӯяд Муҳриддин Ҳасанов дарвозабони навраси тоҷик.

Ҳарчанд тими мунтахаби 16-солаҳои кишвар дар рақобати аввал ноком гардида бошанд ҳам, аз гурӯҳ дар зинаи дуюм ба даври минбаъда роҳ ёфтанд. Ғалабаи даври чорякниҳоӣ барояшон бо мушкилӣ ба даст омад. Дарвозабон дар ин дидор маҳорату малакаи баланд нишондода, ду зарбаи 11-метраи футболбозони тими мунтахаби Кореяи Шимолиро баргардонид. Он вазифае, ки дар пеши даста гузошта буд ба пуррагӣ иҷро гардид. Акнун онҳоро соли 2019 дастаҳои пурқуввати ҷаҳон дар Перу интизоранд.

Аз шикастҳои пай дар пайи дастаи мунтахаби кишвар дар бозиҳои байналмилалӣ нуфӯзи футболи тоҷик барои ҳарифони берунӣ поён фаромад. Аммо ҳеҷ каси онҳо аз наврасони тоҷик ингуна бозии ҷаззобу диданиро интизор набуданд. Ояндагони футболи тоҷик ҷаҳониёнро ба ҳайрат оварданд. Алалхусус дарвозабони кишвар яке аз бозингарони хафнок барояшон ба ҳисоб мерафт.

Дар даври нимниҳоӣ футболбозони Кореяи Ҷанубӣ рӯ ба рӯи наврасони кишвар қарор гирифтанд. Барои роҳ ёфтан ба даври финалӣ пеши онҳоро танҳо як девори дигар баста буд. Вақти асосии бозӣ бо ҳисоби мусовӣ 1-1 ба поён расид. Ҳар ду ҷониб шаштои силсила зарбаҳои 11-метраро ба ҳадаф расониданд. Дарвозабони кишвар Муҳриддин Ҳасанов самти тӯби рақибро пайхас кард ва дар баргардонидани он муваффақ шуд. Ҳаводорони футболи тоҷик ин дастовардро кайҳо интизор буданд. Аз соли 2006 инҷониб футболбозони мо наметавонистанд, ба ин зинаи ифтихорӣ бароянд.

Дар Ҷоми Осиё-2018 футболбозони навраси ҷумҳурӣ сазовори медали нуқра гардида, обрӯ ва шарафи миллат ва футболи тоҷикро дар арсаи байналмилалӣ баланд бардоштанд. Бояд гуфт барои ба чунин натиҷа даст ёфтан нақши дарвозабон Муҳриддин Ҳасанов бисёр бузург буд. Зеро маҳз ӯ бо ҳушёрию чолокӣ ва дараҷаи баланди касбӣ аксарияти ҳамлаҳои ҳарифро бартараф намуд.

Муҳриддин чигуна ба олами футбол пайвастанаш ва чаро ҳамлагар ё ҳимоятгар нею маҳз дарвозабон шуданашро чунин иброз медорад: “Вақте 10-сола будам, бештар бозиҳои “Реал Мадрид”-и Испанияро тамошо мекардам ва аз миёни футболбозони даста бароям дарвозабон Икер Касиляс бисёр маъқул буд. Бозиҳои ӯро дида ба дастаи “Парвоз”-и шаҳри Хуҷанд омада, ҳамчун дарвозабон тамринро шуруъ кардам”.

Муҳриддин то ҳол дар ин даста ба ҳайси дарвозабони асосӣ фаъолият дорад. Ба тими мунтахаби кишвар бошад пеш аз марҳилаи интихобии Ҷоми Осиё шомил шудааст. Зайниддин Раҳимов сармураббии дастаи наврасони кишвар ин дарвозабонро чунин баҳо дод:

“Барои ба даста дарвозабони мувофиқ ёфтан хело машаққат кашидем. Ман ҳамчун сармураббӣ дарк менамоям, ки дарвозабон ними даста аст. Чихеле ки худи шумо шоҳид гардидед, дар мусобиқа чанд маротиба моро аз мағлубият наҷот дод. Ҳама вақт аз Муҳриддин хоҳиш мекардам, ки дар вақти иҷрои зарбаҳои ҷаримавӣ ба ҳамдастаҳояш кӯмак намояд. Ман хурсандам, ки дар ҳар як зарбаҳои кунҷӣ, ки ба дарвозаи мо зада мешуд, ӯ ҳамеша вазифаашро ба хубӣ иҷро мекард. Муҳриддин чунин машқу тамринҳояшро идома диҳад, умед аст, ки яке аз дарвозабонҳои муваффақ мешавад”.

Парвизи Маҳмадамин шореҳи ТВ “Варзиш” маҳорату малакаи дарвозабонии Муҳриддин Ҳасоновро ба дарвозабони машҳури олмонӣ Мануэл Нойер қиёс менамояд:- Баъзе аз мутахассисон дар он назаранд, ки дарвозабони муосир бояд дар ҳолатҳои ба амаломада вокуниши тез нишон диҳад,-мегӯяд Парвиз. - Ва дигаре аз мутахассисон мегуянд, ки барои дарвозабони муосир ин доштани қаду қомати баланд ва дастони дароз муҳим аст, то ин ки тавонад ҳолатҳои душворро бартараф намояд. Аммо ман дар ҳамин замина боз як чизи дигарро мехоҳам ишора кунам. Фикр мекунам ин чиз шояд муҳимтар аз ҳама бошад барои дарвозабонони муосир. Дарвозабон бояд мавқеи дурустро интихоб намояд, агар чанде қаду қомати ӯ баланд ҳам набошад, амали тез ҳам надошта бошад, вале агар дарвозабон мавқеи дурустро интихоб кунад, доимо муваффақ мегардад. Бозиҳои Муҳриддинро дар чемпионати Осиё-2018 тамошо намудем ва чизи муҳиме, ки дар ӯ буд, ин ҳамон дуруст пайхас кардани самти иҷроиши зарбаҳои 11-метра буд. Аз ин нигоҳ онро метавон ба солҳои ҷавонии Мануэл Нойер муқоиса кард.

Бобо Холмуродзода, шореҳи дигари тоҷик дарвозабони навраси кишвар Муҳриддин Ҳасановро яке аз чеҳраҳои ояндаи футболи тоҷик номида, гуфт, ки пас аз он ки дастаи наврасони Тоҷикистон соли 2006 дар чемпионати Осиё барандаи медалҳои биринҷӣ шуданду соли 2007 дар чемпионати ҷаҳон баромад намуданд, он ҷо ҳам кашфи дарвозабонҳо хуб ба назар мерасид: “Махсусан Фаррух Бердиев аз дастаи “Парвоз”, Миралӣ Муродов аз тими “Динамо”-и Душанбе ва умуман инҳо чеҳраҳое буданд, ки баъдан метавонистанд фаъолияти хуби дарвозабониро дар Тоҷикистон ривоҷ диҳанд. Мутаассифона ин дарвозабонҳо дар идомаи фаъолияти худ натавонистанд ба мақсади худ бирасанд. Пас аз солҳои 2008 то оғози соли 2015 мушкилоти асосии дастаи тими мунтахаб ин набудани дарвозабони ҳирфавӣ ва бомароҳат буд. Хушбахтона дар чемпионати Осиё-2018 Муҳриддин Ҳасанов бо маҳорати бениҳоят хуб дастаашро дар мусобиқоти қоравӣ кӯмак кард ва ман фикр мекунам, ки бо чунин дарвозабонони наврас мо ба ояндаи хуб умед мебандем. Муҳриддин дар ин мусобиқа маҳорати баланд нишон дода, аз кашфи дарвозабонони ҳирфавии кишвар дарак дод. Мо умед мебандем, ки бо кашфи дарвозабонҳои наврас ва ҷавони ҷумҳурӣ мушкилии дарвозабонон дар дастаи мунтахаб аз миён меравад”,-мегӯяд ӯ.

Футбол бозии даставӣ мебошад. Барои қаҳрамон гардидан ҳамаи ҳайат бояд талош варзанд. Аммо дар баробари инҳо тақдири асосии рақобатро дарвозабон ҳал мекунад. Метавон гуфт, ки агар дарвозабон ба иштибоҳои нобахшиданӣ даст занад, на Салоҳи мисриву на Мессии аргентинӣ наметавонанд ба даста комёбӣ биёранд.

Муҳаммадҷон Ҳабибуллоев, сармураббии дастаи футболи “Регар-ТадАЗ”-и шаҳри Турсунзода, ба чунин дарвозабонони ҷавону боистеъдод, умеди калон баста, андеша дорад, ки барои ҳамчун дарвозабони ҳирфавӣ гардидан, Муҳриддинро зарур аст дар ҳолати имкон шудан ба дастаҳои футболи давлатҳои хориҷа гузариш намояд. Барои бештар ба воя расонидани чунин дарвозабонони олӣ мақомотҳои дахлдоро мебояд дар кишвар мактабҳои махсуси дарвозабонӣ таъсис диҳанд:

“Дар бозиҳои чемпионати Осиё-2018 барои даста саҳми дарвозабони наврас Муҳриддин хело зиёд буд. Ӯ натанҳо дар силсилазарбаҳои 11-метра, балки дар рафти бозӣ низ маҳорати баланд нишон медод. Дар бозӣ бо Кореяи Ҷанубӣ тавонист чанд имкониятҳои хавфнокро бартараф намояд. Дар дақиқаҳои охири рақобат ду футболбози кореягӣ бо Муҳриддин рӯ ба рӯ баромаданд, аммо дарвозабони мо чусту чолокӣ нишон дода, аз дарвозааш баромад ва ин ҳоларо бартараф намуд. Дарвозабони тими наврасони кишвар фикр мекунам миёни 16-солаҳои Осиё беҳтарин дарвозабон буд,”-иброз дошт Муҳаммадҷон Ҳабибуллоев.

Муҳриддин Ҳасанов, ки айни ҳол дар ҳолати хуби варзишӣ қарор дорад, тамоми қувваю қудраташро барои Ҷоми ҷаҳон ҷамъ намуда истодааст. Ният дорад, ки дар ин мусобиқа зинаҳои фахриро касб намуда, пас аз он ба дастаҳои футболи ҷаҳонӣ гузариш намояд:

“Ба дастаҳои аврупо гузариш кардан орзуи ман аст. Мехоҳам таҷрибаи дарвозабониямро дар давлатҳои пешрафта сайқал дода, дар бозиҳои мунтахаб номи кишвар ва Парчами давлати худро боло бардорам”.

Мо умед дорем, ки дарвозабони навраси тоҷик ба орзуҳои хеш зина ба зина расида, бо маҳорати баланди дарвозабонӣ футболи тоҷикро ба ҷаҳониён муаррифӣ менамояд.