Дастаи мунтахаби футзали Тоҷикистон пас аз анҷоми ҷамъомадҳои таълимии худ дар шаҳри Гулистони вилояти Суғд ҷиҳати иштирок дар мусобиқаи байналмилалӣ ба хотираи собиқ президенти Ассотсиатсияи футболи Узбекистон Мираброр Усмонов озими шаҳри Тошканд гардид, хабар медиҳад ФФТ.

Бино ба иттилои манбаъ, сармураббии мунтахаби Тоҷикистон Пайрав Воҳидов 15 нафар – 4 дарвозабон ва 11 бозингари майдонро бо худ ба Тошканд бурдааст. Дастаи Тоҷикистон бозии ифтитоҳии худро дар мусобиқаи мазкур 19 июл муқобили тими миллии Узбекистон анҷом медиҳад. Вохӯрӣ дар маҷмаи варзишии “Юнусобод” соати 19:30 баргузор мешавад.

Дар Тошканд мунтахаби кишвар инчунин бо дастаҳои Гватемала (20 июл) ва Қирғизистон (22 июл) бозӣ хоҳад кард.

Ҳайати дастаи мунтахаби футзали Тоҷикистон:

Дарвозабонҳо: Фирӯз Бекмуродов, Фирӯз Бозмамадов, Хушбахт Исоев, Нуриддин Ҷабборов.

Бозингарони майдон: Дилшод Саломов, Комрон Алиев, Умед Кузиев, Бахтиёр Солиев, Идрис Ёров, Самандар Ризомов, Баҳодур Хоҷаев, Фирӯз Сангов, Иқбол Воситзода, Абдуқаюм Умаров, Насратшо Исмоилов.

Сармураббӣ – Пайрав Воҳидов.

Яҳё МАҲМАДНАБИЕВ, “ҶТ”