ВАРЗИШ
Душанбе 14 Июл 2025 01:40
11290
Дастаи мунтахаби наврасони Тоҷикистон (U-16) оид ба футбол дар финали CAFA-2025 ба муқобили ҳамтоёни узбеки худ ғалаба карда, барандаи ҷом ва медалҳои заррини ин мусобиқа гардиданд.

Рақобати даври ниҳоӣ рӯзи 31-уми май дар варзишгоҳи “Дӯстлик”-и Тошканд сурат гирифта, бо камбэки миллипӯшони тоҷик хотима ёфт.

Дар аввали рақобат бозингарони мо аз рӯи ҳисоби рақобат аз ҳамтоёни худ қафо буданд. Аммо то анҷоми вақти асосии мусобиқа наврасони кишвар тавонистанд, ҳисоби бозиро 3 бар 3 баробар кунанд.

Бо ҳамин ғолиб дар вақти асосии мусобиқа муайян нашуду он ба вақти иловагӣ рафт. Дар дақиқаи охирини вақти иловагӣ аниқтараш дар дақиқаи 120-ум миллипӯшони кишвар голи ғалабаоварро зада, барандаи ҷоми мусобиқаи қаҳрамонии Ассотсиатсияи футболи Осиёи Марказӣ гардиданд.

Тими миллии Тоҷикистон мусобиқаи мазкурро дар гурӯҳи “В” бо дастаҳои Туркманистон ва Афғонистон оғоз кард. Дар рақобати аввал миллипӯшони кишвар тими Туркманистонро бо ҳисоби 4 бар 1 шикаст дод. Дар рақобати дуюми худ тими мо бо дастаи Афғонистон вориди майдон шуда, ин мунтахабро низ бо ҳисоби 3 бар 0 шикаст дод ва ба финали мусобиқа роҳ пайдо кард.

Қайд кардан ба маврид аст, ки мусобиқаи қаҳрамонии Ассотсиатсияи футболи Осиёи Марказӣ, аз 24 то 31-уми май дар шаҳри Тошканди Узбекистон баргузор шуд. Дар чемпионати мазкур шаш дастаи минтақа - Тоҷикистон, Узбекистон, Қирғизистон, Туркманистон, Эрон ва Афғонистон ширкат карданд. Ҳамаи вохӯриҳои мусобиқа дар варзишгоҳи “Дӯстлик”-и Тошканд доир гардиданд.

Ёдовар мешавем, ки мунтахаби наврасони кишвар таҳти роҳбарии Далер Каёсов бори сеюм ғолиби мусобиқаи CAFA гардиданд. Қаблан Каёсов бо тими наврасон дар солҳои 2022 ва 2023 низ ба гирифтани ҷоизаи мазкур даст ёфта буд.

Баъди қаҳрамонӣ дар мусобиқаи CAFA-2025 тими миллии наврасони то 16-солаи Тоҷикистон бо мунтахаби наврасони то 15-солаи Русия ду бозии дӯстона анҷом медиҳад.

Дар ин бора Федератсияи футболи кишвар иттилоъ додааст. Мувофиқи иттилои манбаъ, мусобиқоти мазкур дар доираи омодагиҳо ба қисми ниҳоии Ҷоми Осиё-2026 рӯзҳои 3-юм ва 6-уми июн дар Варзишгоҳи марказии шаҳри Ҳисор баргузор хоҳанд шуд.

Ҳошим РАҲМАТУЛЛОЕВ, “ҶТ”

Эзоҳи худро нависед



Рамзҳо дар расм