Акмал Убайдов ва Хусравхон Раҳимов муштзанони тоҷик дар Чемпионати ҷаҳон оид ба бокс миёни мардон, ки дар шаҳри Дубайи Амороти Муттаҳидаи Араб ҷараён дорад, ба натиҷаҳои таърихӣ даст ёфтанд.

Аз ҷумла, Акмал Убайдов дар вазни 60 кг 11-уми декабр дар Чемпионати мазкур соҳиби нишони биринҷӣ гардид ва ин сана барои муштзани кишвари мо рӯзи таърихист. Зеро ин шашумин медали биринҷӣ аз мусобиқаҳои Чемпионати ҷаҳон дар таърихи бокси Тоҷикистон дониста мешавад.

Натиҷаи таърихии дигарро дар Чемпионати ҷаҳон оид ба бокс миёни мардон Хусравхон Раҳимов ба номи худ сабт кард ва ӯ ба финали Чемпионати мазкур баромад.

Муштзани тоҷик Хусравхон Раҳимов дар вазни 57 кг дар даври нимниҳоӣ бо қарори якдилонаи доварон (5:0) бар Хуҷаназар Нортоҷиев узбекистонӣ пирӯз шуда, ба финал роҳ ёфт. Ин дастовард таърихист, зеро Раҳимов аввалин муштзани тоҷик мебошад, ки ба финали Чемпионати ҷаҳон баромадааст.

Ёдовар мешавем, ки XXIII-умин Қаҳрамонии ҷаҳон оид ба бокс миёни мардон дар соли 2025 аз 2-юм то 13 -уми декабр дар шаҳри Дубайи АМА баргузор мегардад. Дар мусобиқа беҳтарин муштзанҳои беш аз 120 кишвар аз рӯи 13 категорияи вазнӣ ҳунарнамоӣ доранд. Фонди ҷоизаваии мусобиқа 8,32 миллион доллар мебошад.