Дар ҷаҳони бокс рӯз аз рӯз варзишгарони нав ба арса меоянд. Аммо ангуштшумор варзишгароне ҳастанд, ки ба таври куллӣ метавон бо онҳо ифтихор кард. Яке аз чунин варзишгарони ифтихорофар ҷоизадори чандинкаратаи мусобиқаҳои ҷумҳуриявӣ ва байналмилалӣ Давлат Болтаев мебошад.

Устоди варзиш Давлат Болтаев иштирокчии чандин мусобиқаҳои сатҳи баланд, аз ҷумла чемпионатҳои ҷаҳон дар давлатҳои Итолиё, Ҳиндустон, Изроил ва ҷоизадори ин мусобиқаҳои бонуфуз мебошад. Ӯ имрӯз дар варзиш равияи хоси худ, малакаи баланди варзиширо дорост. Ҳанӯз се сол қабл, соли 2017 дастовараш дар чемпионати ҷаҳонӣ дар Ҳиндустон нуфузи ин варзишгари ҷавонро афзун намуд ва дар ҷодаи кикбоксинг ба шарафи боз ҳам бузург комёб гардид. Дар Ҳиндустон барои дарёфти Ҷоми ҷаҳон ду дафъа варзишгари маъруфи Руссия Константин Карауловро мағлуб намуда, ҷоми ҷаҳонро ба Тоҷикистон оварда буд.

Имрӯзҳо низ ӯ фаъолияти назаррас дошта, пайваста дар мусобиқоти сатҳи байналмилаливу ҷумҳуриявӣ иштироки фаъол дорад. Дар мусобиқаи ҷумҳуриявӣ оид ба бокс, ки 6 апрел дар шаҳри Душанбе ҷараён гирифт, дар вазни 91 кг мақоми аввалро касб намуд. Ҳамагӣ чанд рӯз қабл бошад, дар мусобиқаи бонуфузи байналмилалӣ, ки бо ширкати варзишгарони маъруф аз кишварҳои мухталиф дар Иордания доир гашта буд, сазовори ҷойи ифтихории панҷум гардид.

Тавре ӯ худ иброз медорад, аз мураббияш Алӣ Бабаҷонов, ва кулли омӯзгороне, ки дар камолёбии ӯ саҳм доранд, миннатдор аст. Аз он изҳори хушнудӣ менамояд, ки дар натиҷаи сиёсати варзишпарваронаи Роҳбари давлат ғамхориҳои зиёд ба соҳаи варзиш зоҳир гашта истодааст. Аз комёбиву муваффақияҳои варзишгарони муваффақи кишвар ва ҳамсабақони дигараш изҳори шодӣ менамояд, ки онҳо ифтихори сокинони кишвар гаштаанду дар саҳнаи набарди ифтихорӣ –саҳнаи варзиш миллати бузурги тоҷикро тавассути варзиш муаррифӣ менамоянд.

Мавлон ШАРИФОВ, устоди ДТҶТ
ба номи С.Раҳимов