22-23 апрел се бозии даври ҳафтуми мусобиқаи қаҳрамонии футболи Тоҷикистон миёни дастаҳои лигаи олӣ баргузор шуд.

Дастаи “Хуҷанд”-и шаҳри Хуҷанд 22 апрел, дар майдони худ тими “Регар-ТадАЗ”-и шаҳри Турсунзодаро қабул намуда, бо ҳисоби бузурги 3:0 шикаст дод. Дар дақиқаи 30-уми нимаи аввали дидор ҳамлагари дастаи мизбонон Далерҷон Тухтасунов голи аввалини бозиро ба номаш сабт намуд. Қисми дуюми рақобат бо шиддат оғоз гардида, ҳимоятгарони дастаи “Регар-ТадАЗ” ба фишорҳои соҳибони майдон тоб оварда натавонистанд. Дар дақиқаҳои 60-70-уми рақобат Фарҳод Тоҳиров, ҳамлагари дигари дастаи “Хуҷанд” тавонист ду голи дигарро вориди дарвозаи Владимир Сисоев намуда, ҳисоби бозиро 3-0 намояд.

Дар бозии дигари ҳамин рӯз дастаи “Барқчӣ”-и шаҳри Ҳисор дар меҳмонӣ бар тими “Панҷшер”-и ноҳияи Ҷалолиддини Балхӣ бо ҳисоби 3:2 пирӯз шуд. Голи аввалини дидорро дар дақиқаи 13-ум Шериддин Бобоев, ҳамлагари меҳмонон ба самар расонд. Пас аз 22 дақиқа Фирдавс Зайнуллозода, бозингари “Паншер” тавонист ҳисоби бозиро баробар намояд. Голҳои дигари тими “Барқчӣ”-ро Шаҳром Самиев ва Зиёвуддин Фузайлов ба ҳадаф расонданд. Тӯби дуюми дастаи мизбононро Алишери Ҳотам ба дарвозаи “Барқчӣ” ворид сохт.

Бозии сеюуми даври ҳафтуми лигаи олӣ рӯзи якшанбе, 23 апрел, дар варзишгоҳи “Авиатор”-и пойтахт, миёни дастаҳои ССКА “Помир”-и шаҳри Душанбе ва “Ҳосилот”-и ноҳияи Фархор баргузор гардид. Дастаи мизбон ССКА “Помир”  тавонист ғолиби медалҳои нуқраи футболи кишвар - тими “Ҳосилот”-и ноҳияи Фархорро бо ҳисоби 1:0 шикаст диҳад. Голи ягонаро дар дақиқаи 87-ум, пас аз зарбаи Фирдавс Чақалов бозингари мизбонон, легионери африқоии “Ҳосилот” Акуффо Гершон  ба дарвозаи дастааш зад. 

Пас аз анҷоми бозии мазкур рӯйдоди хеле муҳим барои дастаи “Ҳосилот”- и Фархор ба амал омад. Сармураббии дастаи мазкур Муҳаммадҷон Ҳабибуллоев, бо сабаби муфлис шудани даста, аз вазифааш истеъфо дод. “Хеле барвақт мехостам, ки аз ин мақом биравам. Чанд бор ваъда карданд, ки вазъияти молӣ беҳтар мешавад, аммо нашуд. Имрӯз фурсаташ буд ва ман ҳам қарорамро эълон кардам. Беш аз чор моҳ боз аъзои дастаи “Ҳосилот” маош нагирифтаанд ва ба ин далел бархе аз бозигарони калидӣ, аз ҷумла Иброҳим Рабимов, Ойбек Абдуғаффоров ва легионери узбекистонӣ Сайриддин Ғаффоров дастаро тарк намудаанд”, - иброз дошт сармурабби дастаи “Ҳосилот” Муҳаммадҷон Ҳабибуллоев. 

Ёдовар мешавем, ки шоми имрӯз дар Варзишгоҳи марказии ҷумҳурӣ бозии охирини даври 7-ум лигаи олӣ байни дастаҳои “Истиқлол”-и шаҳри Душанбе ва “Вахш”-и шаҳри Қӯрғонтеппа баргузор мегардад. Оғози рақобат соати 18:30 дақиқа.

Шаҳбози АСОМИДДИН, “ҶТ”