10 октябр дар Тоҷикистон ду бозии даври чоруми марҳилаи интихобии Ҷоми Осиё-2019 оид ба футбол баргузор мегардад. Дар ин дидор тими миллии Афғонистон дар Варзишгоҳи марказии Душанбе мунтахаби Урдунро қабул мекунад.

Бозии гурӯҳи “С”, ки мизбонии онро Афғонистон бар ӯҳда дорад, рӯзи 10 октябр соати 15:00 оғоз меёбад. Бегоҳи ҳамон рӯз, соати 18:00 бошад, Тими миллии Тоҷикистон дар Варзишгоҳи марказии Ҳисор бозии даври чаҳоруми марҳилаи интихобии Ҷоми Осиё-2019-ро дар гурӯҳи “F” муқобили дастаи Непал баргузор мекунад.

Дар мусобиқаи интихобии Ҷоми Осиё-2019 ҳамагӣ 24 даста дар шаш гурӯҳ барои роҳхатҳо ба марҳилаи ниҳоӣ мубориза мебаранд. Аз ҳар гурӯҳ ду дастаи пешсаф ба марҳилаи ниҳоии Ҷоми Осиё-2019 роҳ меёбад.

Ёдовар мешавем, ки дар раддабандии FIFA миёни 211 давлати иштирокчӣ тими миллии Урдун дар зинаи 110-ум, Тоҷикистон дар зинаи 140-ум, Афғонистон дар зинаи 158-ум ва Непал дар зинаи 175-ум қарор доранд.