Аз 2-юм то 11-уми феврал дар шаҳри София – пойтахти Булғористон мусобиқаи байналмилалии “Ҷоми Странҷа” ба хотираи поягузори бокс дар Булғористон ташкил ва баргузор гашт.

Мусобиқа бо иштироки 261 муштзан аз 28 кишвари ҷаҳон доир гардид, ки аз ин шумора 178 нафар мард ва 83 нафар муштзанро бонувон ташкил доданд. Мардон дар 13 вазн ва занон дар 6 вазн рақобат намуда, соҳиби ҷоизаҳо гардидад.

Тоҷикистонро дар ин мусобиқа 9 нафар муштзанон муаррифӣ карданд. Аз миёни онҳо ду муштзани ботаҷриба – Асрор Воҳидов ва Миҷгона Самадова ба гирифтани нишони нуқра даст ёфтанд.

Асрор Воҳидов дар ин сабқат зери вазни 60 кг ҳунарнамоӣ карда, барои роҳ ёфтан ба даври ниҳоӣ Баям Азизбек Уулу аз Қирғизистонро дар даври чорякниҳоӣ ва Дилшод Абдумуродов аз Узбекистонро дар марҳилаи ниманиҳоӣ шикаст дод. Дар марҳилаи ниҳоӣ бошад аз Абдумалик Халоқов варзишгари дигари узбек шикаст хурда, ба гирифтани нишони нуқра шарафёб гашт.

Варзишгари дигари мо - Миҷгона Самадова бошад, дар вазни то 57 кило дар даври аввал Михаел Валш аз Ирландия, дар даври дуюм Юлия Жеремета аз Лаҳистон (Полша), дар марҳилаи ниманиҳоӣ Павлина Олга аз Юнонро шикаст дода, ба финали мусобиқа роҳ ёфт. Дар рақобат барои дарёфти нишони заррин аз Светлана Каменоваи рус мағлуб шуда, бо ҳамин ба гирифтани нишони нуқра даст ёфт.

Қайд кардан ба маврид аст, ки мусобиқаи байналмилалии бокс “Ҷоми Странҷа” дар Софияи Булғористон аз соли 1950 инҷониб баргузор гардида, ин сол мусобиқаи мазкур бори 75-ум доир гашт.

Ҳошим РАҲМАТУЛЛОЕВ, “ҶТ”